Leita
Áskrift | Fréttaskot | Auglýsingar Reykjavík: 12.9° 2m/s NE

  • FÓTBOLTI OG HRUN

    14. nóvember 2009


    Ég er að leggja af stað með tíu ára drenginn suður til Keflavíkur að keppa á fótboltamóti.

    Fyrir rétt um það bil ári fór ég síðast slíka ferð.

    Þá var hrunið nýbyrjað og foreldrarnir, sem fylgdu strákunum sínum, voru eins og í losti.

    Allir að hugsa það sama: Erum við að fara á hausinn? Erum við að missa allt?

    Já, líklega minntum við mest á dálítið skelkaða krakka sem eru þó ráðnir í að láta ekki á neinu bera.

    Ein og ein kaldhömruð athugasemd fauk, en annars var bara reynt að spekúlera í fótbolta á 6. flokks stigi.

    Forvitnilegt verður að sjá hvernig mórallinn er í foreldrahópnum núna. Hvað er breytt, annað en að strákarnir okkar eru komnir í 5. flokk.






    Skrifa athugasemd

  • ÞJÓÐFUNDURINN

    13. nóvember 2009


    Ég verð að viðurkenna að ég skil ennþá ekki alveg hvernig Þjóðfundurinn um helgina mun fara fram, eða hverju er ætlast til að hann skili.

    Þó er ég búinn að hlusta á ein tvö viðtöl þar sem kátir forsvarsmenn fundarins reyndu að útskýra þetta fyrir mér.

    Kannski er ég bara svona tregur af því ég er lítill fundasetumaður.

    En þó ég skilji þetta ekki hundrað prósent, þá hljómar þetta samt skemmtilega.

    Og núna þurfum við svo sannarlega á einhverju nýju að halda, bæði í hugsun og vinnubrögðum.

    Því vona ég að Þjóðfundurinn heppnist vel, og miðað við eldmóðinn í aðstandendunum hlýtur það nú að teljast líklegt.

    Skrifa athugasemd

  • ER ÞETTA LEIÐIN?

    12. nóvember 2009


    Fréttablaðið segir frá því að nú sé til athugunar sérstakur tímabundinn skattur á lífeyrissjóðina. Hann gæti skilað 25 milljörðum króna á ári, og greinilega er verið að hugsa um hann til þriggja ára.

    Þetta hljómar í rauninni mjög vel.

    25 milljarða tekjur af þessum skatti á hverju ári í þrjú ár gætu líklega dugað til að slaka töluvert á kló kreppunnar annars staðar.

    En verði þessi skattur settur á lífeyrissjóði þarf að gæta mjög vandlega að tvennu.

    Í fyrsta lagi verður að vera alveg tryggt og geirneglt að skatturinn sé þá bara til þriggja ára, og verði ekki framlengdur svo lítið ber á.

    Það hefur alltof oft gerst hér á landi að setja hefur átt skatt eða gjöld tímabundið, en svo hefur bara verið haldið áfram að innheimta.

    Og í öðru lagi verður þá að fylgjast grannt með því hverjir fara verst út úr slíkum skatti af eigendum lífeyrissjóðanna (það er að segja almenningi) og finna leið til að bæta þeim það upp við fyrsta tækifæri, það er að segja strax og við verðum orðin forrík aftur!


     

    Skrifa athugasemd

  • HLÝÐIÐ JOSEFSSON STRAX!

    11. nóvember 2009


    Allt frá hruninu hafa menn jarmað og baulað á víxl.

    "Útlendingar verða að koma okkur til hjálpar. Við ráðum ekki við þetta sjálf."

    Enda, af hverju ættum við endilega að ráða við þetta sjálf?

    Þetta er flóknasta og erfiðasta bankakreppa í manna minnum, og ofan á bankakreppuna bætist gjaldmiðilskreppa vegna hinnar handónýtu krónu sem við sitjum uppi með.

    Og af hverju ættum við að eiga mannskap til að fást við þetta?

    Íslendingar eru nákvæmlega jafn margir og íbúar Coventry. Býst einhver í alvöru við að í Coventry hljóti að leynast nógu flinkir einstaklingar til að takast á svona erfiða kreppu?

    Það tókst loks, eftir mikið japl og jaml og fuður, að koma rannsókn á mögulegum brotum í bankakerfinu og víðar á skrið þegar útlendingurinn Eva Joly kom þar til aðstoðar.

    Þegar að endurreisn bankakerfisins kom virtist í fyrstu eiga að leita aðstoðar færustu sérfræðinga erlendis.

    Hingað kom Mats Josefsson frá Svíþjóð, sérfræðingur í að fást við bankakreppu, og veitti ráðgjöf.

    Nú upplýsir Josefsson að íslensk stjórnvöld hafi ekki borið gæfu til að fara nærri nógu vel eftir ráðleggingum hans.

    Sjá hér.

    Er nú ekki ráð fyrir íslensku ríkisstjórnina að láta af þeim flumbrugangi sem Josefsson gagnrýnir og gera bara einu sinni ALLT sem hann stingur upp á, og það STRAX?

    Þykjast íslenskir sérfærðingar vera færari?

    Skrifa athugasemd

  • LÁNSHÆFISFYRIRTÆKIN ERU SJÁLF RUSL

    11. nóvember 2009


    Ég verð að segja: Ég ber afar takmarkaða virðingu fyrir lánshæfismati fyrirtækja á borð við Moodys, Standard&Poor, Fitsch og hvað þau heita.

    Árum saman básúnuðu þessi fyrirtæki að íslensku bankarnir væru traust og frábær fyrirtæki og íslenska ríkið það ábyggilegasta í heimi, eða svo gott sem.

    Og núna, þegar þær fréttir berast hér að eitt þessara fyrirtækja hafi lækkað Ísland niður um tvo flokka í lánshæfismati sínu, svo það sé nú bara steinsnar ofan við ruslflokk, en samtímis sé það merki um betri horfur í íslensku efnahagslífi, þá hristi ég nú bara hausinn.

    Ég nenni bara ekki að heyra meira um þessi fyrirtæki og þeirra rusl.



    Skrifa athugasemd




© 2010 DV ehf. - Allur réttur áskilinn