Leita
Áskrift | Fréttaskot | Auglýsingar Reykjavík: 12.9° 2m/s NE

  • ER HESTAPESTIN ÁRNA MATHIESEN AÐ KENNA?!

    6. júní 2010


    Ég var að hlusta í fréttunum á frásögn um hörmulegar afleiðingar hestapestarinnar. Þetta virðist vera mikil skelfing fyrir hestamenn.

    Ekkert var minnst á sérstakar ástæður þessarar pestar - kannski er ómögulegt að segja til um það.

    En þá fékk ég allt í einu skelfilega hugmynd.

    Árni Mathiesen varð fjármálaráðherra.

    Skömmu síðar hrundi fjármálakerfið.

    Árni Mathiesen varð þá dýralæknir.

    Skömmu síðar fékk allur hestastofninn pest.

    Skyldi vera samhengi þarna á milli ....?!


    Skrifa athugasemd

  • STYRKIR FRÁ HINUM LÁTNU

    6. júní 2010


    Guðlaugur Þór Þórðarson segist aðeins geta birt nöfn þeirra styrktaraðila sinna úr prófkjörinu fræga, sem veitt hafi honum leyfi til þess.

    Athyglisvert er að hann birtir upplýsingar um fjölda styrkja frá löngu dauðum fyrirtækjum, eins og Baugi Group, FL Group, bönkunum ...

    Skyldi Gulli hafa hnippt í líkin og spurt hvort hann mætti upplýsa um styrkina?

    Á sama tíma segist hann hins vegar ekki munu birta upplýsingar um styrki sem hann hafi fengið frá þeim einstaklingum sem látist hafa síðan prófkjörið góða var haldið.

    Skyldi þar vera um marga að ræða?

    Ég minnist þess ekki að hafa heyrt um neina skæða plágu sem gengið hafi í hópi bissnissmanna.

    En ég skil ekki af hverju má birta upplýsingar um styrki frá dánum fyrirtækjum, en ekki dánum einstaklingum.

    Guðlaugur berst nú hatrammlega fyrir pólitísku lífi sínu.

    Einhver ætti að segja honum að stór hluti af þrýstingnum sem nú er á honum (og mun fara vaxandi á næstunni) stafar af því að hann upplýsti ekki um ALLA styrkina til sín.

    Þangað til hann birtir allar upplýsingarnar, þá mun þetta lykta af kattarþvotti og engu öðru.








    Skrifa athugasemd

  • EKKI ÍSBJÖRN Í HÚSDÝRAGARÐINN!

    6. júní 2010


    Heldur virkar það vandræðalega hvernig málsvari Besta flokksins er farinn að reyna að klóra í bakkann varðandi kosningaloforðið fræga um ísbjörn í Húsdýragarðinn.

    Hérna segir Gaukur Úlfarsson að um verði að ræða eins konar heilsubótarvist fyrir ísbirni sem rekast hingað af tilviljun, oft þreyttir og svangir. Þá eigi að fanga lifandi og geyma þá síðan í Húsadýragarðinum í hálft ár eða svo. Gefa þeim að éta, leyfa þeim að hvíla sig og síðan senda þá aftur út á ísinn.

    Þetta segir Gaukur vegna þess að fram er komin gagnrýni á að Besti flokkurinn ætli kannski að eyða hundruðum miljóna í slagorðið "ísbjörn í Húsadýragarðinn" þegar ýmis brýnni verkefni gætu þurft að sitja á hakanum.

    Í reynd er hin nýja áætlun Besta flokksins að líkindum tóm tjara. Jafnvel þó aðeins sé gert ráð fyrir að ísbjörn hafi hálfs árs viðdvöl í Húsdýragarðinum, þá mun það kosta mikið fé að koma upp aðstöðu fyrir hann.

    Svo mikið fé að það er óréttlætanlegt að kosta því til í þessu árferði - sér í lagi vegna þess að enginn veit hvort nokkur þörf verði á því.

    Enginn veit hvenær ísbjörn hrekst næst upp að ströndum okkar. Það gæti orðið á morgun, það gæti líka orðið eftir fimm ár eða tíu.

    Og ætlar Reykjavíkurborg að halda úti sérsveit sem alltaf er tilbúin til að draga á sig stígvél og stökkva á ísbjarnaveiðar ef bangsi birtist? Hvernig ætlar Jón Gnarr að stöðva heimamenn sem jafnan hneigjast til að skjóta ísbirni um leið og þeir sjást?

    Og hefur Gaukur Úlfarsson kannað hvort það sé í rauninni hollt fyrir ísbirni að vera teknir úr sínu náttúrulega umhverfi í hálft ár, þeir látnir kýla vömbina og dekrað við þá á allan hátt, en þeir síðan fluttir upp úr þurru út í náttúruna á ný?

    Það skal tekið fram að ég er í meginatriðum mjög hlynntur því að reynt verði að þyrma lífi ísbjarna sem rekast hingað til lands. Í sjálfu sér hefði ég því síst nokkuð á móti þessari áætlun Besta flokksins. Nema ég hef grun um að það sé ísbjörnum hollast að komast sem fyrst úr klóm okkar og út á ísinn aftur.

    En mergurinn málsins núna er að þetta hljómar eins og furðu gamaldags pólitískt yfirklór. Flokkur stendur frammi fyrir að þurfa að uppfylla vanhugsað og alltof dýrt kosningaloforð og byrjar að bakka frá því.

    "Ja, við meintum nú kannski ekki alveg að þetta ætti að vera svona, heldur vorum við frekar að tala um svona, eða jafnvel verður hægt að sleppa með þetta ..."

    En Besti flokkurinn þarf ekki að haga sér svona.

    Ólíkt öllum öðrum flokkum og framboðum í samanlagðri stjórnmálasögunni, þá ætlast enginn til þess að Besti flokkurinn standi við kosningaloforðin sín.

    Sem er í sumum tilfellum guðsþakkarvert - samanber kosningaloforðið um að ættleiða róna, og annað þess háttar grín.

    Að Besti flokkurinn skuli í tilfelli ísbjarnarins hafa leiðst út í þrautþjálfaða en hundleiðinlega aðferð við að bakka með kosningaloforðin sín, í stað þess að blása þau bara sjálfur út af borðinu, það þykir mér heldur verra.

    Eitthvað hefðbundið við það.

    Besti flokkurinn nýtur þeirrar óvenjulegu sérstöðu að geta byrjað með algjörlega hreint borð. Kjósendur hans og líklega flestallir borgarbúar búast við því af honum að hann innleiði ný vinnubrögð og nýjan hugsunarhátt, og að því ætti hann að einbeita sér.

    Enginn ætlast á hinn bóginn til þess að hann uppfylli kosningaloforð sín! - og hann ætti því ekki að fara að klóra svona í bakkann.



    Skrifa athugasemd

  • JÓHANNA BÚIN AÐ SKÝRA SITT MÁL

    5. júní 2010


    Jóhanna Sigurðardóttir forsætisráðherra verður vissulega að skýra skilmerkilega frá aðkomu sinni að launamálum Más Guðmundssonar Seðlabankastjóra. Mogginn hefur nú birt upplýsingar úr tölvupóstum (sjá hér) sem virðast stangast á við orð Jóhönnu á þingi, sjá hérna.

    Í sjálfu sér er vafalítið ekkert óeðlilegt við að hún hafi tekið þátt í að ákveða nýjum Seðlabankastjóra laun. En það er verra ef hún hefur farið úr ræðustól á Alþingi rangt með afskipti sín af frægum launahækkunum/lækkunum Más Guðmundssonar sem komust í hámæli fyrir nokkrum vikum.

    Vera má að það sem virðist vera augljóst misræmi í orðum Jóhönnu á þingi annars vegar og í tölvupóstunum hins vegar, eigi sér ósköp eðlilega skýringu. Stundum kann ég ekki að lesa úr orðfæri kansellísins. En það verður fróðlegt að heyra þá skýringu. Að minnsta kosti er ljóst að Jóhanna kemst ekki upp með neinn moðreyk þegar hún skýrir þetta mál.

    Hún getur ekki farið fram á að aðrir stjórnmálamenn umgangist sannleikann af virðingu, ef hún gerir það ekki sjálf.

    Kannski er þetta stormur í vatnsglasi. Annað eins hefur gerst. En það er þá best að koma því almennilega hreint.

    - - - - -
    Viðbót.

    Á Pressunni.is hafa nú birst stutt komment frá Jóhönnu vegna málsins. Sjá hér. Skýring hennar er einfaldlega sú að þótt henni hafi borist tölvupóstar um launamál Más frá honum, þá hafi hún ekki svarað þeim, þar eð hún hafi ekki talið þau mál í sínum verkahring.

    Þetta hljómar mjög sennilega - og ekki síst vegna þess hve afdráttarlaus orð Jóhönnu voru á þingi um að hún hefði ekki komið nálægt þessu. Ýmislegt má eflaust segja um Jóhönnu en hún hefur ekki verið staðin að því hingað til að ljúga blákalt.

    Svo kannski er þetta mál þrátt fyrir allt svolítil smjörklípa af Mogganum ...! Það kæmi ekkert svakalega mikið á óvart. En ætli það komi ekki í ljós á næstunni.
    - - - - -

    Enn seinni viðbót.

    Samkvæmt þessari frétt á Eyjunni verður ekki betur séð en Jóhanna hafi allan tímann sagt satt og rétt frá.

    Sem er hið besta mál.

    Einhverjir munu enn þrefa um málið, en ég fæ ekki séð að þessi þáttur (um hvað Jóhanna vissi, hvað hún sagði og hvað hún gerði) þarfnist frekari umræðu.




    Skrifa athugasemd

  • VILJUM VIÐ AMERÍSKAN FORSETA?

    5. júní 2010


    Ágúst Einarsson fráfarandi rektor á Bifröst kvaddi skólann með heilmikilli ræðu í dag, þar sem hann tók meðal annars upp hina gömlu hugmynd Vilmundar Gylfasonar og Bandalags jafnaðarmanna, að framkvæmdavaldið yrði kosið beinni kosningu hér á landi.


    Vilmundur var náttúrlega ekki fyrstur manna til að fá þessa hugmynd, en hann gerði málið að þungamiðju í baráttu BJ fyrir kosningarnar 1983.

    Eftir á að hyggja voru það mistök hjá Vilmundi. Margir höfðu áhuga á að styðja hann í baráttu gegn spillingu og samtryggingarkerfi stjórnmálaflokkanna, en barátta fyrir beinni kosningu framkvæmdavalds var ótímabær - enda höfðu litlar sem engar umræður farið fram um málið. Það ruglaði því bara kjósendur í ríminu að Vilmundur ætlaðist til að þeir styddu þetta baráttumál hans, án þess að hafa hugsað það til enda.

    Ef að líkum lætur verður kosið til stjórnlagaþings í september; það verða að minnsta kosti meiri svikin ef það mun enn dragast eitthvað að ráði. Og þegar það tekur til starfa mun hugmyndin um beina kosningu framkvæmdavaldsins koma alvarlega til umræðu.

    Og því er í rauninni nauðsynlegt að hefja umræður um málið strax. Svo umræðan verði komin eitthvað áleiðis þegar stjórnlagaþingið tekur til starfa, og menn viti að minnsta kosti um hvað er að ræða.

    Vilmundur vildi láta kjósa valdamikinn forseta, rétt eins og í Bandaríkjunum og Frakklandi. Það er ekki endilega eina leiðin - það má líka kjósa forsætisráðherra, en halda forsetaembættinu sem valdalausri puntstöðu.

    Ýmislegt kemur til mála. En það væri gaman að heyra hvað fólki hugnast.

    Skrifa athugasemd




© 2010 DV ehf. - Allur réttur áskilinn