Ósköp er þetta ömurleg fyrirsögn hjá Pressunni.is um austurrísku stúlkuna Natöschu Kampusch og væntanlega sjálfsævisögu hennar.

"Ætlar að græða á hryllingnum" er fyrirsögn - og dómur - Pressunnar um ævisagnaritun stúlkunnar.

Stúlkan var eins og menn muna fangi barnaníðings að nafni Priklopil í átta ár. Á þeim tíma bast hún mannræningja sínum vitaskuld tilfinningaböndum, það segir sig bara sjálft um barn sem lendir í þessum hryllingi.

Menn hafa raunar lengi haft grun um að sagan um samband þeirra Natöschu og Priklopil væri merkileg og lærdómsrík og fyllilega þess virði að segja hana - þótt ófögur sé.

Natascha Kampusch hefur raunar vakið athygli fyrir það af hve miklu hugrekki hún hefur reynt að horfast í augu við heiminn eftir sína skemmdu æsku.

En nei - þá ákveður einhver blaðamannsdóni á Pressunni uppá Íslandi að það eina sem vaki fyrir Natöschu sé að græða á öllu saman.

Eðlileg hvöt hverrar manneskju, sem lendir í miklum raunum, til að segja sögu sína, er dregin niður í svaðið af þessum blaðamanni Pressunnar.

Ég stórefast satt að segja um að viðkomandi blaðamaður þekki nokkuð til Natöschu Kampusch persónulega eða sé þess umkominn að leggja dóm á það hvað vaki fyrir henni með bókaskrifunum.

Það skiptir auðvitað engu þótt Natascha Kampusch muni aldrei frétta af þessari fyrirsögn. Söm er skömmin.

Svona vinnubrögð eru billegt drasl.


- - - - - -

Pressan hefur nú breytt fyrirsögn sinni. Fyrirsögnin er nú "Skrifar bók um hryllinginn". Breytingin er mjög til bóta.