Hvaða karlagrobb er þetta í Má Guðmundssyni Seðlabankastjóra í viðtali við Reuters?

Það má kannski segja að það sé hluti af starfi Seðlabankastjóra að bera sig vel og einkum í útlöndum.

Tala ekki kjark úr þeim sem kynnu að vilja koma með peninga til landsins, eða yfirleitt versla eitthvað við okkur.

En mér er sama. Ég vona auðvitað að þetta sé rétt hjá Má, og hef út af fyrir sig ekki ástæðu til að ætla annað.

En mér þætti brýnna að hann úttalaði sig um af hverju hann er svona dæmalaust ánægður með peningastefnuna sem hann sjálfur smíðaði en klikkaði svo eftirminnilega hér síðustu árin.

Og sömuleiðis væri gott að fá skýringar á því af hverju margir málsmetandi hagfræðingar eru á því að nauðsynlegt sé að lækka stýrivexti hér strax, og afnema höftin hið bráðasta - en Seðlabankinn virðist þeirrar skoðun að fyrst gæti verið nauðsynlegt að hækka stýrivexti enn frekar!

Og herða höftin.

Hver hefur rétt fyrir sér?

Er nauðsynlegt að við sveiflumst eins og pendúll milli andstæðra skoðana, með tilheyrandi tilfinningaróti á þessum erfiðu tímum?

Már ætti að beita sér fyrir því að Seðlabankinn talaði við þjóð sína, áður en hann fer með karlagrobb í útlöndum.