Halldór Halldórsson hefur ýmsa fjöruna sopið í íslenskri blaðamennsku. Hann var og vildi vera brautryðjandi í rannsóknarblaðamennsku. Og margt skrifaði hann merkilegt á sínum tíma.

Mestum hvirfilbyl lenti Halldór í þegar hann var ritstjóri Helgarpóstsins sáluga og fór að skrifa um Hafskip undir stjórn Björgólfs Guðmundssonar.

Í byrjun virtist hann koma upp um sukk og fjármálaóreiðu, gott ef ekki lögbrot Hafskipsmanna.

Og þeir voru dregnir fyrir dóm.

Þegar mun minna varð úr ákærum gegn Hafskipsmönnum en lagt var upp með kviknuðu grunsemdir um að Halldór hefði farið offari.

Hafði hann bara verið verkfæri gamla kolkrabbans í Eimskipafélaginu sem vildi losa sig við skæðan keppinaut?

Það vissum við ekki, en Halldór hvarf af sjónarsviði í langan tíma.

Nú skýst hann fram í dagsljósið aftur og það með hvelli.

Frásögn hans og blaðamanna DV af uppgangi Björgólfs-feðga í Rússlandi fyllir margar síður í Helgarblaði DV í dag en er "skyldulesning" eins og það heitir nútildags.

Sumt af þessu höfum við heyrt áður, en aldrei í þessum smáatriðum. Og þarna er margt sem við höfum ekki haft hugmynd um.

Ég hef auðvitað ekki forsendur til að meta hvort alveg allt sé fullkomlega 100 prósent í frásögninni, en þó það væri ekki nema brot ...!