Viðar Hreinsson er ekki að skafa utan af því þegar hann skammaði fræðimenn á málfundi Sagnfræðingafélagsins fyrir að hafa ekki gagnrýnt "vitfirrt gjálfur" Ólafs Ragnars Grímssonar forseta um "eðlisþætti Íslendinga" umfram aðrar þjóðir.

Þetta kemur fram í Fréttablaðinu, sjá hér.

Viðar Hreinsson er framkvæmdastjóri Reykjavíkurakademíunnar, menntaður í íslensku og bókmenntum og líklega kunnastur fyrir vandaða ævisögu sína um Stephan G. Stephansson. Hann hefur setið í dómnefndum menningarverðlauna DV í flokki fræða, og er öllum hnútum kunnugur í fræðasamfélaginu.

Ólafur Ragnar er sjálfur fræðimaður og hefur hingað til verið eins og fiskur í vatni meðal háskólafólks.


Mig grunar að þó gagnrýni Viðars hafi raunar ekki síður beinst að fræðimönnunum sjálfum en forsetanum, þá hljóti skot úr þessari átt að vera Bessastaðabónda einstaklega þungbært.