Áðan birti ég þennan pistil hér um yfirvofandi málstofu um heimskreppuna og framtíð kapítalismans sem Háskóli Íslands hefur séð sóma sinn í að biðja Hannes Hólmstein Gissurarson að annast.

Eftir að sá pistill birtist hafði samband við mig ungur stjórnmálafræðinemi sem valdi í fyrra að sitja svipaða málstofu um "íslenska velferðarríkið".

Það kom honum nokkuð á óvart að upp skyldi dúkka Hannes Hólmsteinn sem leiðbeinandi á þessari málstofu.

Enn meira kom honum á óvart að það sem Hannes hafði fram að færa voru ekkert annað en "brjálæðislegar árásir á velferðarkerfið", eins og stjórnmálafræðineminn ungi komst að orði.

"Þetta voru bara bollaleggingar um hvernig mætti takmarka velferðarkerfið sem mest, og koma sem mestu af því sem eftir væri í hendur einkaaðila," sagði hann.