Nú er farið að hellirigna í Reykjavík. Það er heldur sjaldgæft, þetta sumarið. Reyndar hvarflar oft að mér hvílík guðsblessun það er, hvað veðrið hefur verið óvenjulega gott og bjart í sumar.

Hugsið ykkur bara ef við hefðum þurft að þola ógurlegt rigningasumar, eftir býsnaveturinn mikla.

Ég man eftir sumrum þar sem rigndi nánast upp á hvern dag og dumbungur og drungi ríkti flesta daga. Og ég má varla til þess hugsa hvernig þjóðinni liði ef sumarið nú hefði verið af þeirri gerðinni.

Ég er ekki viss um að þjóðin hefði lifað það af.

Söguritarar framtíðarinnar mega ekki gleyma hinu góða veðri sumarið 2009 þegar þeir reyna að skilja hvernig þjóðin tókst á við hrunið.

Við svona viðkvæmar aðstæður hefur jafnvel veðrið pólitíska merkingu.