Ekki hefur mér enn borist svarbréf frá Björgólfi Thor við þessu bréfi hér. Ég bíð þó rólegur enn.

Reyndar hvíslaði að mér lítill fugl áðan að Björgólfur Thor væri reyndar á Íslandi þessa dagana, en ekki á Kýpur eða einhvers staðar eins og ég hélt. Hann er sagður vera hér í einhverjum yfirheyrslum vegna bankahrunsins, annaðhvort hjá rannsóknarnefnd Alþingis eða sérstökum saksóknara.

Jafnframt fylgdi sögunni að Björgólfur Thor hefði brugðið sér á skemmtistaðinn B5 um helgina, en ekki mætt sömu góðu móttökunum og hér í eina tíð, þegar jafnt Geir Haarde sem heldra fólk skemmtanalífsins tók Björgólfi Thor ævinlega opnum örmum þegar hann kom til landsins.

Nei, nú er þvert á móti sagt að hellt hafi verið yfir hann brennivíni í gríð og erg.

Hvort eitthvað er hæft í þessari sögu hef ég ekki minnstu hugmynd um. Það tek ég skýrt fram. En ef Björgólfur Thor er á landinu ættu alla vega að vera hæg heimatökin að svara minni kurteislegu spurningu. Svarið þarf bara að vera "já" eða "nei".