Nú er sólarhringur síðan ég skrifaði Björgólfi Thor Björgólfssyni opið bréf um hvort hann muni ekki örugglega ganga glaðbeittur í að borga það sem eftir kann að standa af Icesave-skuldum okkar Íslendinga þegar búið verður í fyllingu tímans að selja eigur Landsbankans.

Hann hefur ekki svarað ennþá, en ég bíð rólegur. Það er vafalaust mikið að gera við alþjóðlegar fjárfestingar um þessar mundir, en ég treysti því að hann svari við allra fyrsta tækifæri.

Og í þessu sambandi er kannski rétt að halda einu til haga.

Björgólfur Thor sagði í viðtali í fyrrahaust að hann hefði róið að því öllum árum síðustu dægrin fyrir hrun Landsbankans að koma Icesave-reikningunum úr ábyrgð íslensku þjóðarinnar. Bretar hefðu verið til í tuskið, sem og hann sjálfur.

Ríkisstjórnin og/eða Seðlabankinn hefðu hins vegar ekki brugðist nógu hratt við og því hefði farið sem fór.

Það kann vel að vera rétt, og þá er ábyrgð ríkisstjórnar Geirs Haarde og/eða Seðlabankans blýþung í þessu máli.

Og vel skiljanlegt að Björgólfur Thor beri af þeim sökum þungan hug til þessara aðila.

Á hinn bóginn leysir það hann þó ekki undan ábyrgð af Icesave-reikningunum. Því þær skuldir, sem fyrirtæki hans efndi til, falla á alla íslensku þjóðina en ekki á þær örfáu persónur sem kunna að hafa klúðrað málum síðastliðið haust.

Bara svo því sé til skila haldið.