Nú á að hrekja Bókabúð Máls og menningar úr húsnæði sínu á Laugaveginum.

Hún borgar víst ekki nógu háa leigu, og verður að fara.

Það þykir mér satt að segja eitthvert mesta óbótaverk og svívirða sem hægt væri að vinna í bæði skipulags- og menningarmálum höfuðborgarinnar.

Bókabúðin á mjög stóran hlut í því lífi sem enn er á Laugavegi.

Þegar Árni Einarsson framkvæmdastjóri MM fann upp á því að hafa opið til klukkan tíu á kvöldin, þá gerbreytti það kvöldlífinu í miðborg Reykjavíkur í einni svipan.

Ég þekki ekki fasteignamarkaðinn við Laugaveginn í þaula, en af hverju er sú leiga sem bókabúðin hefur borgað hingað til ekki nægjanleg?

Þarna hefur búðin verið í áratugi og staðið af sér bæði góðæri, kreppur og gróðæri. Hvað hefur breyst?