Eftirfarandi opið bréf til Jóhönnu Sigurðardóttur og Steingríms J. Sigfússonar sendi ég rétt í þessu á póstföng þeirra hjá Alþingi. Ég vona að þau líti enn á þau, þótt bæði hafi nú aðalbækistöðvar sínar í ráðuneytunum.

Ágætu Jóhanna Sigurðardóttir og Steingrímur J Sigfússon.

Ég skrifa ykkur sem forystufólki nýrrar ríkisstjórnar.

Sjálfur er ég áhugamaður um samfélagsmál á Íslandi og langar að biðja ykkur að svara einni fyrirspurn frá mér.

Hverjir eru eigendur þeirra “jöklabréfa” sem skipta nú svo miklu máli fyrir framtíðina í íslensku efnahagslífi og hversu háar upphæðir á hver þeirra um sig?

Ég kem ekki auga á neina ástæðu fyrir því af hverju ætti að halda því leyndu hverjir eiga þessi bréf. Hef ég þá sérstaklega í huga heitstrengingar ykkar og annarra um að nú séu runnir upp tímar aukins gegnsæis á Íslandi.

Mér finnst raunar – og veit að það finnst fleirum – að við höfum skilyrðislausan rétt til að fá að vita þetta. Ekki sé ég að í því sambandi skipti neinu máli, þó ekki sé búið að útkljá hvað um þessi bréf verður.

Þetta bréf mun ég birta á bloggsíðu sem ég held úti. Ég mun líka birta þar svör ykkar strax og þau berast.

Með vinsemd og virðingu ...