Ásmundur Einar Daðason heitir nýr þingmaður Vinstri hreyfingarinnar - Græns framboðs.

Hann segist í Fréttablaðinu í dag vera á móti aðild Íslands að Evrópusambandinu. Sjá hér.

Það er gott og blessað. Vitaskuld hefur Ásmundur Einar fullan rétt á því.

En hann gengur undarlega langt. Hann segir: "Ég er mjög harður Evrópuandstæðingur og stend við það ... Þetta er mín sannfæring og prinsipp og ég mun fylgja því í rauðan dauðann."

Rétt áður en útlit virðist fyrir að Alþingi samþykki að sækja um aðild að ESB svo loksins fáist niðurstaða í það deilumál hvort aðild henti okkur eður ei, þá er harka Ásmundar Einars ekki aðdáunarverð.

Því maður vonar að þingmenn taki afstöðu til mikilvægra mála á málefnalegum grunni - í þessu tilfelli sem sagt á grunni þess sem kemur út úr aðildarviðræðum - en ekki á grundvelli þingmanna sem koma fyrirfram til leiks með sín prinsipp sem þeir fylgja fram "í rauðan dauðann".

Sjálfstæðismenn höfðu nýfrjálshyggjuna að sannfæringu og prinsippi. Þeir fylgdu henni í rauðan dauðann - ekki fyrir þá sjálfa, heldur fyrir okkur.

Ég frábið mér svona "stefnufasta" þingmenn. Ég ætlast til að þeir skoði mál með opnum huga þegar þau liggja fyrir.

Öll mál.