Katrín Jakobsdóttir menntamálaráðherra hefur sýnt viðleitni í þá átt að vilja hugsa málefni RÚV upp á nýtt.

Það er gott.

Ég efast ekkert um að Þorgerður Katrín fyrrverandi ráðherra og Páll Magnússon útvarpsstjóri hafi haft gott eitt í hyggju með þeim breytingum á Ríkisútvarpinu sem þau stóðu fyrir.

En burtséð frá þeim mögulegu "tæknilegu" göllum sem þær breytingar höfðu í för með sér, þá var á þeim einn stór meinbugur.

Þær snerust bara um "fyrirtækjavæðingu" RÚV og stjórnsýslu þess sem fyrirtækis. Það var reyndar helsti gallinn: litið var á RÚV sem hvert annað fyrirtæki. Með tilheyrandi háum launum fyrir æðstu stjórnendur.

En Ríkisútvarpið er alls ekki hvert annað fyrirtæki.

Tilverugrundvöllur þess felst í því menningarlega hlutverk sem það á að gegna, engu öðru.

Og það hlutverk hefur orðið útundan.