Í framhaldi af nöturlegri grein í Helgarblaði DV um bruðlið hjá FL Group, þá datt mér í hug frásögn gestkomandi manns þegar FL Group opnaði skrifstofu í Kaupmannahöfn snemma árs 2007.

Þá lék enn allt í lyndi og hlutabréfin á uppleið. Brjálæðislegt tapið ekki komið í ljós.

Maðurinn sem sagði mér frá þessum var sem sagt gestkomandi þarna og blöskraði bruðlið.

Og þegar langt var liðið á kvöld datt alveg af honum andlitið.

Eftir heilmikið ball var fjör heldur betur farið að færast í leikinn.

Og þá stukku Hannes Smárason og helstu samstarfsmenn hans og vinir allir upp á borð og dönsuðu eins og vitlausir menn.

Lyftu öðrum hnefanum og örguðu hamslausir af fögnuði:

"Útrásin! Útrásin! Útrásin! Útrásin!"