Ég verð að segja að það kom mér svolítið á óvart að Hannes Hólmsteinn skyldi ekki þagna algjörlega eftir hrunið í fyrrahaust.

Því það var svo augljóslega hrun á öllu því sem hann hefur sagt og gert gegnum tíðina.

Hrun allrar hans stefnu.

Og vissulega var Bleik brugðið. Hannes lét lítið á sér kræla lengi.

Svo fór hann að skrifa eina og eina grein. Flestallar til varnar leiðtoga lífsins, Davíð Oddssyni.

En nú eru að koma kosningar og þá er Hannes þagnaður aftur.

Það hefur lengi tíðkast fyrir kosningar að Sjálfstæðisflokkurinn setji Hannes í þagnarbindindi. Reyni að láta fólk gleyma honum - og því að hann og skoðanir hans eru í raun það sem Sjálfstæðisflokkurinn hefur gengið út á síðustu 20-30 árin.

Svo er varla búið að greiða síðasta atkvæðið þegar hann dúkkar upp aftur að túlka niðurstöðurnar fyrir sína menn.

Nú er enn eitt þagnarbindindið skollið á. Af hverju skartar Sjálfstæðisflokkurinn ekki myndum af Hannesi í kosningabaráttunni?

Hann er hugmyndafræðingurinn, bæði fyrir og eftir hrun.