Ingibjörg Sólrún á vafalaust eftir að vinna margt gagnlegt starfið, hvort sem það verður á sviði hefðbundinna stjórnmála eða á öðrum vettvangi, þegar hún verður komin til heilsu á ný.

Mér þótti augljóst að hún ætti að taka sér hlé af pólitískum ástæðum. Í stjórn Samfylkingar og Sjálfstæðisflokks gerði hún nokkur mjög afdrifarík mistök, sem hún hlaut að axla ábyrgð á.

Að halda fast við öryggisráðsframboðið í stað þess að sinna málum hér heima.

Að fljóta sofandi að feigðarósi í efnahagsmálum.

Að tukta ekki Sjálfstæðisflokkinn strax til verka eftir hrunið.

Það er hins vegar til marks um hve öflug Ingibjörg Sólrún er sem stjórnmálamaður og manneskja að með viðtalinu á Skjá einum á laugardag hafði henni eiginlega tekist að fá mig til að skipta um skoðun.

Það virtist allt í einu tómt rugl að vilja að svo gáfuð og heiðarleg og hreinskiptin manneskja drægi sig í hlé meðan alls konar sótraftar væru á sjó dregnir.

En nú hefur heilsan tekið af henni ráðin um skeið.

Vonandi nær hún sér sem fyrst; þá verður hún eflaust boðin velkomin til starfa á ný.