Guðmundur Andri Thorsson spyr í Fréttablaðinu í dag hvort við þurfum nokkuð stjórnlagaþing og "nýtt lýðveldi".

Hvort við þurfum ekki bara að hætta að kjósa Sjálfstæðisflokkinn.

Vissulega þarf Sjálfstæðisflokkurinn á fríi að halda eftir hugmyndafræðilegt hrun stefnu hans undanfarin ár og slímsetu á valdastóli. En málið er samt ekki svo einfalt, eins og ég held reyndar að Guðmundur Andri hljóti að gera sér grein fyrir.

Vissulega þurfum við nýja stjórnarskrá þar sem kveðið er á um opnari stjórnsýslu, mun ríkari aðskilnað löggjafarvalds og framkvæmdavalds og fleira af því tagi.

Ég held hins vegar að það sé kannski full mikið í lagt ef það á endilega að kjósa 63 manna stjórnlagaþing sem situr svo og svo lengi við að semja nýja stjórnarskrá og kostar heilmikla peninga.

Mín hugmynd um stjórnlagaþingið er einfaldari. Hún er svona:

Alþingi setur einfaldlega lög um stjórnlagaþing þar sem kveðið er á um að einn einstaklingur, sem allir treysta (jú, slíkt fólk er til!!) hreinlega setji saman þingið.

Mín vegna mætti það vera Vigdís Finnbogadóttir, en ég mundi nú samt velja minn ágæta nágranna Egil Helgason.

Síðan bætist við 12-15 þingmenn  helmingurinn tilnefndur af stofnunum eins og helstu háskólum, hinn helmingurinn af ýmsum samtökum almennings, þar á meðal og ekki síst ýmsum þeim lýðræðishreyfingum sem upp hafa sprottið að undanförnu: Nýtt lýðveldi, Lýðveldisbyltingin, Raddir fólksins, etc.

Þetta þing ræður sér til aðstoðar stjórnlagafræðinga til að setja hugmyndir sínar í lögformlegan búning og veita ráðgjöf um hvernig málum er háttað í öðrum löndum.

Ég held að þetta væri einfaldara og skilvirkara en 63 manna þing sem fyrst þyrfti að kjósa. Þetta þing gæti vel náð trúnaði þjóðarinnar, enda færu allar umræður fram fyrir opnum tjöldum, og almenningi væri gert kleift að taka þátt í störfum þess með einhverjum hætti.

Þetta þyrfti ekki að vera svo voðalega flókið mál - flestir eru jú sammála um það helsta sem þarf að ná fram, en meira spurning um útfærslu.

Síðan myndi þingið altént leggja niðurstöðu sína - hina nýju stjórnarskrá - fyrir þjóðina sem greiddi atkvæði um já eða nei.

Þar næst yrði skráin lögð fyrir Alþingi sem færi auðvitað ekki að ganga í berhögg við vilja þjóðarinnar í svo mikilvægu máli.

Er þetta nokkuð svo vitlaust?