Eins og sagt er frá á Pressunni hér lentu þeir Egill vinur minn Helgason og Hannes Hólmsteinn Gissurarson í orðahnippingum á Facebook í morgun.

Eftir að Óskar Magnússon og Þorsteinn Már Baldvinsson réðu húsbónda Hannesar á Moggann og veittu honum þar með nýtt pólitískt líf, þá er Hannes skriðinn úr hýði sínu og fer nú mikinn á vefsíðum.

Í þessum orðahnippingum við Egil telur hann sig t.d. þess umkominn að "fyrirgefa" Agli sem hafi beðið ósigur í rökræðum við hann.

Ég þarf ekkert að hafa nein orð um það þegar helsti forsöngvari útrásarinnar, maður sem síðast haustið 2007 hvatti til þess að gefið yrði í í útrásinni, þykist geta "fyrirgefið" manni sem fjallaði alltaf um útrásina af mikilli tortryggni.

Og hefur átt meiri þátt í því en flestir aðrir að hjálpa okkur að horfast í augu við sannleikann um samfélagið eins og það var orðið.

Það sem vakti hins vegar athygli mína var að tvívegis í þessum Facebook-umræðum líkir Hannes sér við Gyðinga í Þriðja ríki Hitlers.

"... ég hef sömu réttarstöðu í augum Egils Helgasonar og gyðingur hafði í Þriðja ríkinu ..."

Og:

"Egill talar um mig eins og valdhafar í Þriðja ríkinu töluðu um gyðinga."

Sko.

Í fyrsta lagi ...

Hannes talar fyrir hóp manna sem þangað til fyrir skömmu síðar réðu öllu sem þeir vildu ráða í Sjálfstæðisflokknum og í íslensku samfélagi yfirleitt.

Þetta eru mennirnir sem hleyptu útrásinni af stað. Það breytir engu þó Davíð Oddssyni hafi verið persónulega uppsigað við útrásarvíkinga eins og Jón Ásgeir og jafnvel Kaupþingsmenn; hann er samt skilgetinn faðir útrásarinnar.

Að ekki sé minnst á einkavæðinguna.

Þetta var hópur manna sem naut valdanna út í ystu æsar, og misnotaði þau oft.

Markviss viðleitni hópsins var að koma sér og vinum sínum fyrir alls staðar í opinberri stjórnsýslu á Íslandi.

Mörg dæmi eru hvernig sett var ofan í við þá sem ekki féllu í kramið hjá klíkubræðrum.

En hinum hampað sem voru "í talsambandi" við klíkuna, eða "innmúraðir og innvígðir" eins og það var orðað.

Það er þessi hópur sem ber mesta ábyrgð á hruninu.

Ekki aðeins með því að leyfa bönkum útrásarmanna að vaxa okkur langt upp fyrir höfuð, heldur líka með ómögulegum ákvörðunum á öllum sviðum efnahagsmála.

Allt frá því hvernig umræður um nýja mynt og peningastefnu voru ævinlega kveðnar í kútinn og til þess hvernig Davíð Oddsson gerði Seðlabankann gjaldþrota.

Ef að þessi hópur ætlar nú að fara að líkja sér við Gyðinga í Hitlers-Þýskalandi, þá er það merki um jafn mikla firringu og þegar Ármann Þorvaldsson auðkýfingur og bankastjóri líkti sér við fátæklingana á Ellis-eyju, sjá hér.

Að lítil og harðsvíruð valdaklíka, sem hefur keyrt heilt þjóðfélag á slig, skuli telja sig í sömu stöðu og Gyðingar sem nasistar í Þýskalandi drápu í milljónavís, það er svo geggjað að ég á eiginlega ekki eitt einasta orð.

Hannes Hólmsteinn, sem er sögufróður maður, á að vita betur.

Og það er ekki hægt að segja að þetta sé á neinn sambærilegt, það er til dæmis bara augljóst bull að Egill tali um Hannes eins og nasistar um Gyðinga.

En ósvífnin ríður ekki við einteyming á þessum bæ.