Þegar við Egill Helgason unnum saman á Helgar-Tímanum í gamla daga fundum við upp á að veita "ljós vikunnar" þeim sem hafði gert eða skrifað eitthvað óvenju heimskulegt þá vikuna.

Þeir sem "unnu" þennan "heiður" fengu kerti í verðlaun, en fáir urðu til að sækja kertið sitt.

Ef ég man rétt var Gestur Guðmundsson félagsfræðingur sá fyrsti sem náði í kertið sitt, en ég man ekki hvað hann hafði til saka unnið að mati okkar unglinganna.

Ég á varla von á að Árni Mathiesen fari sjálfviljugur til Ameríku til að ná í verðlaunin sín hjá Huffington Post en vonandi splæsa forráðamenn vefsíðunnar í flugfar til Íslands til að afhenda verðlaunin.

Það væri eins og viðeigandi punktur yfir i-ið í niðurlægingu okkar (sem ætluðum að verða fjármálamiðstöð heimsins) að sjá fjármálaráðherra okkar taka við verðlaunum sem "versti bankamaður heims".

Ég mundi mæta á þá verðlaunaafhendingu.