Þegar ég var úti að keyra í gær heyrði ég Loga Bergmann vera að lesa sjónvarpsfréttirnar í útvarpinu.

Það var kynnt frétt um að símareikningar á Bessastöðum væru háir.

Svo byrjaði fréttin.

"Símareikningar Ólafs Ragnars Grímssonar á Bessastöðum nema að meðaltali nítján þúsund krónum ..."

Hvaða, hvaða, hugsaði ég í snarheitum.

Nítján þúsund krónur á mánuði er vissulega frekar svona í hærra lagi fyrir venjulegt heimili. En þó ekkert svakalegt.

Og mér auðnaðist líka tími til að hugsa í kúnstpásu Loga Bergmanns: Er nú pirringurinn í garð Ólafs Ragnars orðinn svo mikill að Stöð 2 heldur að það sé einhver ægilegur skandall að forsetaembættið sé með nítján þúsund króna símareikning á mánuði.

"... á dag," hélt Logi Bergmann áfram.

Auðvitað veit ég að þessar tölur eiga við alla starfsmenn embættisins en ekki bara Ólaf Ragnar sjálfan.

En samt.

Á dag!