Fyrst ég er búinn að auglýsa annað blaðið mitt í dag, þá er best að auglýsa hitt líka!

Í kvöld eða fyrramálið kemur nefnilega í búðir nýtt hefti af SKAKKA TURNINUM þar sem sérstaklega verður fjallað um kvikmynd sem fer nú eins og eldur í sinu um internetið, auk þess sem mig grunar að hún sé til á DVD í Laugarásvídeói og kannski víðar.

Þetta er heimildarmyndin Zeitgeist, þar sem fjallað er um upphaf peningakerfis Vesturlanda og því er beinlínis haldið fram að auðkýfingar hafi svarist í fóstbræðralag um að halda alþýðunni í þrælaböndum.

Höfundar Zeitgeist rekja sig um söguna og allt til 11. september og núverandi kreppu, og mörgum þykja dæmin sem þeir benda á - máli sínu til sönnunar - vera skelfilega sannfærandi.

Er kreppan nú vandlega "hönnuð atburðarás"?

Tekið skal fram að rannsóknarblaðamaður SKAKKA TURNSINS er ekki allsendis sannfærður um að Zeitgeist-höfundar hafi að öllu leyti rétt fyrir sér, eins og kemur fram í ítarlegri umfjöllun blaðsins, en það er best að leyfa fólki að kynna sér þetta sjálft.

Kápumyndina vann Jón Óskar Hafsteinsson upp úr frægu plakati sem gert var á 4. áratug 20. aldar og átti að sýna uppgang nasismans með hjálp alheimskapítalismans.