Undanfarið hafa menn skemmt sér við þær fréttir að Jesúa frá Nasaret hafi ekki fæðst á jóladag heldur þann 17. júní.

Ástralski stjörnuvísindamaðurinn Dave Reneke kveðst hafa fundið þetta út.

Hann hefur reiknað út útlit stjörnuhiminsins kringum Krists burð og komist að því að þann 17. júní árið 2 f.Kr. hafi reikistjörnurnar Venus og Júpíter verið svo nálægt hvor annarri á himninum að þær hafi nærri runnið saman í eitt.

Litið út eins og ný stjarna.

Og vitringarnir hafi því farið af stað að finna frelsarann.

Ég vona að enginn taki þessa sögu mjög hátíðlega. Því auðvitað er sagan um vitringana og Betlehem-stjörnuna bara tilbúningur.

Vel má vera að 17. júní 2 f.Kr. hafi Júpíter og Venus myndað eina stjörnu að sjá. En það hefur þá aðeins gerst í stuttan tíma.

Og vitringar austur í Babýlon ("Austurlöndum" segir hjá guðspjallamanninum Matteusi) hefðu að sjálfsögðu vitað hvers kyns væri.

Og þó þeir hefðu rokið af stað hefðu pláneturnar löngu verið skildar að aftur þegar þeir komu vestur til Palestínu.

Og þessi "nýja stjarna" hefði aldrei nokkurn tíma "staðnæmst" yfir fjárhúsinu þar sem Jesúa á að hafa fæðst í Betlehem. Hún hefði alltaf virst jafn langt í burtu í vestri.

Fyrir nú utan að vitringarnir og Betlehemsstjarnan koma aðeins fyrir hjá Matteusi, ekki hinum guðspjallamönnunum. Og er hvorttveggja augljós tilraun Matteusar til að búa til "tákn og teikn" þegar frelsarinn fæddist, eins og algengt er að menn smíði kringum helstu fæðingu helstu átrúnaðargoða sinna.

Og sé yfirhöfuð eitthvað hægt að vita um það hvenær Jesúa fæddist, þá var það líklega árið 6-7 f.Kr.

Þannig að við verðum að líklega að láta okkur nægja að halda upp á fæðingu Jóns Sigurðssonar næsta 17. júní.