Afar reyndur og vitur bankamaður rakti mér hugmyndir sínar um hvað gera þurfi heimilum í landinu til bjargar. Eftir því sem mín þekking dugar, sýnist mér þetta vera mjög athyglisverðar tillögur. Ég vona að einhverjir lesendur komi þeim á framfæri á réttum stöðum.

Hann sagði:


"Hugmyndir mínar um hvernig við leysum vanda hinnar venjulegu fjölskyldu á ef til vill ekkert erindi í aðrar sóknir, en þær eru sjálfsagt ekkert minna ígrundaðar en ýmislegt annað bjargræði, sem við höfum séð um þessar mundir.


Í raun byggir þetta á heimspeki Þjóðreks biskups eins og segir í Paradísarheimt, "að mikið fæst ekki fyrir lítið, no sir".


Þess vegna er nauðsynlegt að gera sér grein fyrir því að áður en við leggjum upp í slíka för, að færa þeim aðstoð, sem minna mega sín, að þá er ekki hjá því komist að við verðum að taka það af einhverjum öðrum sem eitthvað eiga.


Ef við viðurkennum ekki þetta grundvallaratriði er leiðin ófær.


Kemur einkum tvennt til, annað hvort skilja menn þetta ekki eða vilja það ekki, sem er líklegra.


Það er ekkert verðmætara við þessar aðstæður en að stappa stálinu í fólk og fá það til að trúa því að það borgi sig að borga af lánunum sínum, ella mun illa fara.


Því þá munu fjármálafyrirtækin þurfa að taka mjög mikinn fjölda íbúða til sín á uppboði. Þar með fellur verðið enn frekar.


Þegar vísitalan sér um að hækka lánin langt fram yfir verðmæti íbúðanna mun fólk sjá hag sinn í því að hætta að borga, enda virðist manni að það hafi engan tilgang.


Þar með er vonin tekin frá fólki, sem er að ómetanlegt og geysilega víðtækt tjón.


Ég tel að við eigum að festa vísitöluna eins og hún var í júní s.l. í eitt ár og nota þann tíma til að finna varanlegar lausnir, eins og að skipta um mynt, eða eitthvað annað, sem menn kunna að finna út á þessum tíma.


Ennfremur verður að lækka vexti og gefa fólki kost á að greiða þá eingöngu á meðan erfiðasti tíminn stendur yfir.


Erlendu lánin verður að frysta, því allar líkur eru til þess að gengið styrkist á ný með tímanum.


Nauðsynlegt er að fólk greiði inn á lokaðan reikning álíka upphæð og það hefði kostað að greiða lánið niður, miðað við gengisvísitöluna ca. 170.


Til að jafna þann mun sem mynast við slíkar aðgerðir væri rétt að stofna neyðarsjóð sem ríkið myndaði og yrði greiddur niður á nokkrum árum með sköttum.


Ennfremur verða fjármagnseigendur að taka ákveðinn hluta á sig, ekki síst lífeyrissjóðirnir.


Þetta er eins og ég sé þetta í megin atriðum."