Óþægilegt þegar upp dúkka menn sem virðast vita sínu viti og hvetja okkur til að sleppa láninu frá IMF.

Ég meina ekki menn sem tala í heitingum eins og Jónas Kristjánsson, með fullri virðingu fyrir honum.

Nei, ég meina menn eins og Daniel Gros.

Sem vill að við sleppum IMF-láninu en tökum upp evru strax í dag.

Hvernig veit óhagfróður maður eins og ég hvað er rétt og hvað er rangt?

Hvar er sá umræðuvettvangur hagfræðinga sem getur ráðlagt okkur?
Ég hef hingað til verið þeirrar skoðunar að það dygði ekkert annað en taka þetta IMF-lán.

Svo hitti ég konu í gær sem býsnaðist yfir því að við værum að snapa lán hjá IMF og lán hjá Skandínövum og lán hjá Rússum og lán hjá Kínverjum og lán hjá Japönum og lán hjá Pólverjum.

"Er þetta ekki bara eitt risavaxið myntkörfulán?" spurði hún. "Og er ekki alltaf verið að vara mann við þeim ósköpum?"