Þegar ég hef verið að keyra heim úr Vesturbæjarlauginni um kvöldmatarleytið að undanförnu hef ég iðulega mætt Jóni Ásgeiri Jóhannessyni á ýmsum sínum Range Roverum, hvítum eða svörtum.

Hann er þá að koma eða fara frá aðalstöðvum Baugs við Túngötu.

Ég get vottað að Jón virkar prýðilegur bílstjóri og alls enginn glanni svona innanbæjar.

En þegar þetta gerðist síðast ávarpaði ég Jón Ásgeir í huganum og sagði:

"Æ, vinur, hefurðu ekki haft alveg skammarlega lítinn tíma til að dvelja í íbúð þinni í New York að undanförnu?"

Ég skal fúslega viðurkenna: Þetta fannst mér ansi fyndið hjá mér ...