Á leiðinni upp Ártúnsbrekkuna í mínum hlýja Volvó nú áðan heyrði ég að fréttamaður byrjaði að lesa frétt:

"96 prósent landsmanna bera traust til ..."

Og mér gafst tími til að hugsa á einu sekúndubroti: Hjálpi mér! Er einhver í þessu landi sem 96 prósent landsmanna bera traust til? Hver í ósköpunum gæti það verið?

"... slökkviliðsins," hélt fréttamaðurinn áfram.

Þar lá að. Það er kannski ekki skrýtið þó ráðamenn í landinu hafi stundum reynt að bregða yfir sig kápu slökkviliðsmannsins þegar þeir lýsa viðfangsefnum sínum þessa dagana. "Slökkva elda ... á brunastað ... olía á eld ..."

Og stela með því svolitlu af því trausti til slökkviliðsmannanna sem yfirvöldin njóta ekki sjálf.