Ég sá minnst af blaðamannafundunum sem Geir Haarde hélt í gær. Þurfti að fara með son minn ungan í fótbolta.

Því missti ég af tveimur alveg ótrúlegum mómentum sem Grímur Atlason vekur athygli á á bloggsíðu sinni.

Þegar fréttamaður Stöðvar 2 minntist á að orðspor Íslands á alþjóðavettvangi hafi beðið hnekki, þá svaraði Geir með þjósti:

"Hver segir það?"

Og þegar fréttamaður sagði augljóst að peningamálastefna Seðlabankans hefði brugðist, þá svaraði Geir aftur (ótrúlegt en satt):

"Hver heldur því fram?"

Fréttamaðurinn svaraði að vonum að flestir hagfræðingar væru sammála um þetta.

En Geir hélt áfram að haardera: "Við tökum ekki afstöðu til þess."

Nei? "Við" tökum ekki afstöðu til þess hvort peningastefna Seðlabankans hafi brugðist. Hvaða "við"? Á Geir við ríkisstjórnina? Er Samfylkingin sammála þessu mati?

Það verður að vekja þennan mann. Og samtímis að kveða niður í honum hrokann.

Það er hægt að byrja á því verki á Austurvelli klukkan þrjú í dag.