Geir Haarde boðaði til blaðamannafundar á föstudaginn var. Hann og Björgvin komu þar og sögðu ekkert.

Tilgangurinn var augljóslega sá að gefa fólki samt þá tilfinningu að ríkisstjórnin væri með fingurinn á púlsinum.

Svo færri myndu mæta á mótmælafundinn daginn eftir?

Vonandi verður blaðamannafundurinn í dag ekki alveg jafn innilega tilgangslaus.

Vonandi verður tilkynnt að þar sé búið að koma Icesave-málinu í einhvern farveg.

Vonandi verður tilkynnt um alvöru ráðstafanir til bjargar illa stöddu fólki á Íslandi, ekki bara í Bretlandi og Hollandi.

Vonandi verður tilkynnt um alvöru rannsókn á bankahruninu með tilstyrk útlenskra sérfræðinga, ekki aðeins nýjan saksóknara Björns Bjarnasonar.

Vonandi verður tilkynnt um tafarlausa umsókn um inngöngu í ESB.

Ekki aðeins að á fundi inni í kústaskap í Valhöll hafi kannski verið ákveðið að hefja ef til vill umræðu við sjálfstæðisfélagið á Krummaskuði um það að máske skyldi opnað á þann hugsanlega möguleika að einhvern tíma í framtíðinni sé líklegt að hvísla megi þessum valkosti að einhverjum í draumi.

En hvað svo sem koma mun fram á þessum blaðamannafundi má það ekki koma í veg fyrir að fólk mæti á mótmælafundinn á Austurvelli klukkan þrjú á morgun.

Auðvitað er blaðamannafundurinn í aðra röndina hugsaður sem brella til að fá sem fæsta á þann fund.

En látið ekki blekkjast!

Mætum öll!