Á morgun verður ár liðið frá fjöldamorðunum í Osló og Útey.

Á næstu dögum mun ég birta færslu í fimm hlutum sem skrifuð var í fyrrasumar í kjölfar þessara hræðulegu atburða.  Með skrifunum var gerð tilraun til að setja atburðina í það samhengi sem blasti við.

Fyrsti hluti kallast Dagurinn og snýst um atburðarásina þann 22. júlí 2011 í Osló og Útey og fyrstu viðbrögð fjölmiðla.

Annar hluti ber heitið Stríðsyfirlýsingin og fjallar um Breivik og þá hugmyndafræði sem hann ber fyrir sig.

Yfirskrift þriðja hluta er Utan skynsamlegra takmarkana.  Kaflinn tekur til uppgangs evrópskra stjórnmálasamtaka sem berjast gegn fjölmenningu og þeirra samfélags- og efnahagslegu aðstæðna sem slík viðhorf spretta upp úr og þrífast í.  

Fjórði hluti nefnist Öfgamarkaðshyggjan og gerir þeirri efnahagsstefnu sem hefur verið ríkjandi á Vesturlöndum allt frá 1980 skil.

Fimmti hluti heitir Viðbrögðin og tekur til ákveðinnar orðræðu sem merkja mátti í kjölfar árásanna.

Ástæðan fyrir því að ég fjalla um þessi mál og geri tilraun til að kafa undir yfirborðið á innflytjendaumræðunni er sú að mér finnst mikilvægt að reyna að átta mig á því hvað býr að baki fordómum og hvers vegna jarðvegur virðist frjór fyrir slíkan hugsanagang víða í Evrópu.

Harðsoðin niðurstaða mín er að efnahagslegar aðstæður og framúrkeyrsla öfgamarkaðshyggju, spili þar ákveðna rullu. Aðstæður sem hefðbundnir stjórnmálaflokkar hafi ekki haft burði til að leysa úr í sátt við almenning sem harmar sinn hlut. Stjórnmálamenn með misgóðan tilgang skynji þessa stöðu, tappi inn á reiðina og beini henni í þann farveg sem þjóni þeirra málstað.

Færslurnar voru upphaflega birtar á Eyjunni í september 2011.