Prófessor í stjórnmálafræði hefur nú lýst þeirri skoðun sinni að það hafi litla þýðingu að opna bókhald forsetaframbjóðenda fyrir kosningar.  Rökin sem hann færir fyrir þeirri skoðun eru að Ríkisendurskoðun fari lögum samkvæmt ekki yfir gögnin fyrr en eftir kosningar og þá fyrst komi í ljós hvort rétt hafi verið greint frá.

Skilaboðin sem felast í þessari greiningu prófessorsins eru umhugsunarverð.  Þau eru að gagnsæi umfram það sem fjórflokkurinn hefur af illri nauðsyn sammælst um að sé fullnægjandi vegna utanaðkomandi þrýstings GRECO skipti nokkru máli.  Stjórnmálafræðingurinn er með öðrum orðum að leggja blessun sína yfir gildandi lög um fjármál stjórnmálasamtaka og frambjóðenda.

Þau lög hafa verið harðlega gagnrýnd fyrir ýmsar sakir.  Meðal annars fyrir að vera í andstöðu við vilja afgerandi meirihluta landsmanna þegar kemur að heimild stjórnmálasamtaka og stjórnmálamanna til að taka við fjárframlögum frá fyrirtækjum (68% andvíg) og fjárframlögum frá einstaklingum án þess að nafn þess einstaklings sem veitir styrkinn sé gefið upp (79% andvíg).

Sú röksemdafærsla að það hafi lítið upp á sig að opna bækurnar fyrir kosningar af því Ríkisendurskoðun muni ekki sannreyna bókhaldið fyrr en eftir kosningar er auk þess mjög veik.  Enginn vitiborinn maður myndi láta sér detta það í hug að ljúga til um framlög í eigin kosningasjóð fyrir kosningar vitandi að nokkrum vikum síðar kæmi hið sanna á daginn.