Í kjölfar dóms hæstaréttar í gær um að ekki hafi verið heimilt að rukka seðlabankavexti aftur í tímann á áður gengistryggt lán er ljóst að þeim aðstöðumun sem skapaðist á milli þeirra sem voru með verðtryggð lán og þeirra sem voru með gengistryggð lán haustið 2008 hefur verið snúið á hvolf.

Tilurð Hagsmunasamtaka heimilanna má rekja til þess að þessir tveir hópar, skuldarar með verðtryggð lán og skuldarar með gengistryggð lán, ákváðu að berjast saman fyrir réttlátu uppgjöri við hrunið og áhrifum þess á stöðu heimilanna, í stað þess að sækja fram á völlinn í sitthvoru lagi.

Tillögur HH um bráðaaðgerðir vegna verðtryggðra og gengistryggðra lána, sem kynntar voru þann 12. febrúar 2009, snérust í stuttu máli um að reikna gengistryggð lán eins og þau hefðu verið verðtryggð og fara svo í almenna leiðréttingu á öllum lánastabbanum.  Stefnt var að þeirri niðurstöðu að jafna stöðu skuldara með réttlátum hætti vegna aðstæðna sem þeir gátu engan vegin borið ábyrgð á.

Í staðinn fyrir að hlusta á okkur ákváðu stjórnvöld að fara sértækar fjallabaksleiðir á forsendum fjármálafyrirtækjanna með misjöfnum árangri, svo ekki sé fastar að orði kveðið.  Afleiðingin af þeirri stefnu hefur meðal annars skilað sér í því að sú meðferð sem lántakendum hefur staðið til boða hefur ekki bara verið mismunandi eftir því hvort fólk var með gengistryggt eða verðtryggt lán heldur einnig eftir því hvar fólk var svo heppið eða óheppið að taka lánið upphaflega.

Stjórnvöld höfðu öll tækifæri til að taka stjórn á þessum aðstæðum og stýra þjóðfélaginu í sáttahöfn en með samningum við kröfuhafa hinna föllnu banka og aðra lánveitendur var þeirri för afstýrt til miklu verri vegar.  Þetta verða stjórnvöld að viðurkenna nú þegar og svara því hvernig þau ætla að taka ábyrgð á þeirri stöðu sem blasir við nú.

Ætla stjórnvöld að leika þann leik að egna lántakendum saman, að halda áfram að deila að drottna, í umboði fjármálafyrirtækja, eða ætla stjórnvöld að taka sér tak og grípa til aðgerða sem jafna rétt skuldara í þjóðfélaginu?  Því nú þarf að leiðrétta verðtryggð lán og afnema verðtryggingu svo leikurinn verði ekki endurtekinn.  Eða dettur einhverjum til hugar að mótmæla því?  Að mótmæla því að læra af reynslunni?

Síðasta tækifæri ríkisstjórnar Jóhönnu Sigurðardóttir og þess þingmeirihluta sem hana styður er fólgið í viðbrögðunum við þessum nýfallna dómi.  Ef þau falla á prófinu verða þau að víkja.

Við, skuldarar, skulum hinsvegar ekki gera bönkunum það til geðs að rífast innbyrðis.  Stöndum frekar saman.  Þannig náum við árangri.  Sendum stjórnvöldum og fjármálakerfinu skýr skilaboð um hvað við viljum.  Í því sambandi legg ég til að við látum kröfuna um leiðréttingu verðtryggðra  lána og afnám verðtryggingar hljóma sem aldrei fyrr!