Svarthöfði bíður þess spenntur að fá að segja nei við Icesave-lögunum í þjóðaratkvæðagreiðslu. Það kemur auðvitað ekki til greina að segja já við þeim álögum sem fylgja samningum við Breta og Hollendinga um að greiða þeim til baka þá peninga sem Björgólfur Guðmundsson og Björgólfur Thor og Kjartan Gunnarsson báru ábyrgð á að blekkja almenning í þessum löndum til að leggja inn á reikninga Landsbankans. 

Í framhaldi þeirrar þjóðaratkvæðagreiðslu mun þjóðin fá aragrúa af slíkum atkvæðagreiðslum. Við verðum spurð um skattahækkanir ríkisstjórnarinnar: Vilt þú greiða hærra skatta og útsvar?  Svarið verður nei. Í framhaldinu verður síðan lagt í þjóðaratkvæði hvort lækka eigi skatta og útsvar. Yfir 90 prósent þjóðarinnar munu samþykkja slíkt. Þá mætti skjóta inn lögum um að það verði frítt í bíó fyrir alla landsmenn. Það munum við auðvitað samþykkja. 

Ein mikilvæg atkvæðagreiðsla verður að fara fram. Risastórt kúlulán upp á yfir 300 milljarða króna, sem tekið var vegna gjaldþrots Seðlabankans undir stjórn Davíðs Oddssonar, má ekki greiða til baka án samþykkis þjóðarinnar. Það verður því kolfellt og þær þjóðir og stofnaninir sem lánuðu peningana verða að bíta í þann súra rabbabara að við borgum ekki skuldir sem rekja má til óreiðumanna. 

Það pirrar marga að þurfa að borga aðgöngumiða í Hvalfjarðargöngin, ferjur, flug, strætisvagna og annað sem telst til almenningssamgangna. Með einfaldri þjóðaratkvæðagreiðslu mætti afnema þau gjöld. Í sömu atkvæðagreiðslu mætti svara eftirfarandi spurningu: Vilt þú greiða 17 þúsund krónur á ári í nefskatt til Ríkisútvarpsins? Yfirgnæfandi meirihluti þjóðarinnar mun láta afnema jeppaskatt Ríkisútvarpsins og gera samgöngur allra landsmanna gjaldfríar. 

Forseti Íslands mun hafa nóg að gera við að vísa málum í þjóðaratkvæði. Í rauninni þarf hann ekkert að brjóta heilann um þessi mál. Það yrði regla fremur en undantekning að þjóðin kvæði upp sinn dóm. Vandi forsetans gæti þó orðið stór ef Alþingi vildi spara á hans kostnað með því að leggja forsetaembættið hans niður. Í þjóðaratkvæðagreiðslu gæti spurningin verið þessi: Viltu spara 200 milljónir með því að leggja niður embætti forseta Íslands? Svarthöfði mun auðvitað samþykkja þann sparnað líkt og þorri þjóðarinnar. Loksins er að renna upp sú tíð að raunverulegt lýðræði verði á Íslandi.