Borgaralegu hægrimennirnir í Sjálfstæðisflokknum eru búnir að greiða fyrstu niðurgreiðsluna á ofurstyrkjunum sem komu þeim í sögubækurnar rétt fyrir síðustu þingkosningar. Auðvitað er ekki hlaupið að því fyrir fátækan stjórnmálaflokk að borga 55 milljónir króna og því um að gera að borga þetta niður á nokkrum árum. Enda er það svo heppilegt að eftir því sem lengri tími líður áður en styrkirnir eru endurgreiddir að fullu verður verðmætið sem er endurgreitt minna en ella. Styrkirnir hljóðuðu upp á 55 milljónir þegar þeir voru veittir og eru komnir í hátt í sjötíu milljónir í dag vegna verðbólgu. Og þegar 55 milljónirnar hafa verið greiddar styrkveitendum eftir nokkur ár standa 19 milljónir eftir, það er að segja verðbæturnar sem Sjálfstæðisflokkurinn hefur uppgötvað að eru frekar óþægilegt fyrirbæri fyrir þá sem ætla að endurgreiða fé.

Þó hlýtur maður að velta fyrir sér hverjir borga hverjum. Einhverjum kynni að detta í hug að Sjálfstæðisflokkurinn notaði ríkisstyrki til stjórnmálaflokka til að endurgreiða styrkina. Og auðvitað væri það dáldið við hæfi að siðbót stjórnmálamanna væri að vissu leyti á kostnað ríkissjóðs og þar með skattgreiðenda, kjósendanna í landinu. En þar með er ekki öll sagan sögð því eftir stendur spurningin um hverjir fá þetta borgað. Bæði FL Group og Landsbankinn eru komin í þrot og bankinn í eigu ríkisins. Það gæti því verið svo að ríkispeningar séu notaðir til að endurgreiða ríkisbanka.

Sögunni lýkur þó ekki þarna því stjórnmálamenn sáu til þess að stjórnmálaflokkar - og stuðningsmenn þeirra - sitja við sama borð og líknarfélög og trúfélög og þeir sem styrkja slík samtök. Gefendurnir geta nefnilega fengið skattaafslátt út á styrki sína. Þannig að þegar menn gáfu pening til stjórnmálaflokksins síns sluppu þeir við að borga samsvarandi upphæð í skatta. En þá vaknar auðvitað spurningin: Verða FL Group og Nýi Landsbankinn ekki að greiða skatta aftur í tímann? Því ekki geta þeir haldið skattaafslættinum núna þegar þeir eru búnir að fá styrkina endurgreidda og eiga því ekki rétt á skattaafslættinum. Og verða þá ekki peningar úr ríkissjóði notaðir til að endurgreiða ríkisbanka gamla styrki sem leiða svo til þess að ríkisbankinn verður að borga fé til ríkissjóðs?

Gömul frænka Svarthöfða sagði eitt sinn að batnandi fólki væri best að lifa. Og vissulega á það við um sjálfstæðismennina sem hafa komist að því að það var slæmt að safna ofurstyrkjunum. Og vissulega á það líka við um að forysta flokksins hafi áttað sig á því hvað verðbæturnar eru skaðlegar fyrir þá sem þurfa að endurgreiða háar fjárhæðir. Nú er bara spurning hvort ekki sé hægt að fá fleiri flokka til að endurgreiða styrki sína og það án þess að borga verðbætur. Þegar þessi einföldu reikningsdæmi blasa við þeim og brenna á þeirra eigin skinni hljóta þeir allir að sjá að rétt sé að leggja verðbæturnar af.