Undanfarin tvö ár hafa hippar aftur náð fótfestu á Íslandi. Ekki það að hippar hafi verið útdauðir, síður en svo, heldur var stofninum haldið niðri markvisst frá efnahagsþrengingunum á níunda áratugnum. Nú þegar mikið góðæri hefur verið í efnahagslífinu hafa sífellt fleiri hippar komist á legg.

Hippar hafa aðra sýn á heiminn en samferðamenn þeirra. Þeir líta svo á heiminn, að hann geti orðið eins og þeir vilja að hann sé. Þannig er talið að hippar greini lítið á milli langana sinna og hins ytri heims. Flokka mætti hippa undir hugsjónamenn að þessu leyti, þar sem skynjun þeirra er sambland af óskhyggju og raunveruleika.

Hippar eru í flestum tilfellum gæfir, einna helst sökum hassreykinga sem deyfa sjálfsbjargarviðleitni þeirra, en nokkrar þekktar undantekningar eru á því. Reykvískir hippar taka sér aðallega bólfestu í eldri byggingum í miðborginni, og eru hippagreni á víð og dreif um Þingholtin og við Laugaveg. Dæmi eru um að hippar hópist saman til þess að veita niðurrifi þessara bygginga andstöðu, líkt og gerðist þegar stóru hippagreni var eytt þar sem skemmtistaðurinn Sirkus var staðsettur. Hippar þrífast ekki í nýrri byggingum.

Jafnframt eru nokkur dæmi um hegðunarröskun meðal hippa undanfarin ár, þar sem nokkrir einstaklingar hafa yfirgefið kjörsvæði sín í miðborginni og farið upp til fjalla. Þar hafa þeir verið til trafala fyrir verkamenn og var á tímabili fastur liður í störfum þeirra að stugga þeim á brott. Í ljós kom að sumir hippanna höfðu komið langt að, en þeir höfðu verið skráðir í miðborgum Vestur-Evrópu.

Reynslan sýnir að hippar hrífast af hvalahljóðum. Þannig hefur sýnt sig að ef tónlist Sigur Rósar er spiluð á tilteknu svæði, eykst þéttleiki hippa þar. Svo virðist sem tónlistin örvi hippa og tendri hjá þeim árásarhneigð sem beinist gegn raunveruleikanum. Til marks um fyrrnefnda villu í heimssýn hippastofnsins má nefna að helstu ummerkin eftir mótmæli hippa gegn álframleiðslu eru áldósir sem liggja á víð og dreif.

Fæðusamsetning hippa samanstendur fyrst og fremst af grænmeti og bjór. Algengt er að hippar neyti kjötlíkis úr sojabaunum sem kallað er tófú. Í gær birtust rannsóknir sem sýna að minnisstöðvar heilans eru allt að fimmtungi smærri hjá tófú-ætum. Þetta er enn eitt dæmið um skakkaföll hippastofnsins, allt frá því að fyrstu einstaklingarnir komu fram í nútíma, á síðari hluta sjöunda áratugarins. Sá stofn var lífseigur en neysla hass og ofskynjunarlyfja gerði nánast út af við hann.

Hippar eru af stofni sníkjudýra og þrífast eins og áður sagði einungis í góðæri þegar svo mikil umframframleiðsla er í þjóðfélaginu að einstaklingar komast upp með að lifa í iðjuleysi. Því er talið að efnahagsþrengingar í Bandaríkjunum í kringum 1980 hafi átt lykilþátt í að gera út af við stofninn þarlendis.

Flestir hippar taka hamskiptum þegar þeir geta sér afkvæmi á þrítugsaldri og breytast í gilda þjóðfélagsþegna. Umbreyttir hippar halda hins vegar oft eftir ýmsum sérkennum stofnsins. Þeir eru þekkjanlegir á skrautlegum lopapeysum og ökutækjum sínum, sem oft eru af gerðinni Toyota Prius. Margt bendir til þess að sífellt fleiri hippar taki hamskiptum þessa dagana vegna efnahagsþrenginga sem neyða þá út í að leggja sitt til framleiðslu þjóðfélagsins.