Kreppa, verðhrun fyrir helstu útflutningsvörur og aðrar hörmungar duga ekki til að draga úr Íslendingum kraftinn eða draga úr fjölda þeirra. Vissulega er hætt við að Íslendingum fækki dálítið fyrst um sinn vegna kreppunnar en það er bara tímabundið ástand.
Íslendingum mun fjölga og þeim mun fjölga mikið. Og Íslendingar eiga eftir að eldast heil heljarinnar ósköp. Kannski svo mjög að breyta verður barnaskólum í elliheimili en það verður samt að koma betur í ljós síðar.

Íslendingar verða nefnilega 408.835 talsins árið 2050. Þetta eru niðurstöður nýjustu könnunar Hagstofunnar (sem gengur reyndar undir heitinu mannfjöldaspá). Þar kemur reyndar ekki fram hvort þetta verði 1. janúar eða 1. desember en það skiptir kannski ekki miklu máli. Mestu máli skiptir að okkur fjölgar og það ekkert smá. Við verðum því eftir 42 ár orðin 95 þúsund fleiri en við vorum 1. janúar síðastliðinn. Það er ekki lítil fjölgun. Því miður kemur ekki fram í könnuninni hvenær Íslendingar verða orðnir ein milljón talsins. Þó má reikna út að miðað við meðalfólksfjölgun upp á 0,6 prósent er ljóst að við verðum orðin ein milljón talsins árið 2202. Reyndar verðum við ekki bara orðin milljón talsins. Við verðum orðin heil ein milljón og 170 manneskjum betur. Sennilega laust upp úr hádegi 20. desember.

Okkur fjölgar ekki bara heldur eldumst við. Nú er þrítugasti hver landsmaður orðinn áttræður en árið 2050 verður tólfti hver landsmaður búinn að fagna áttræðisafmæli sínu og allmargir öllu fleiri afmælisdögum. Þá verða sem sagt 33.933 landsmenn sem hafa fæðst ekki síðar en árið 1970. Nú eru þeir áttræðu og eldri ekki nema rétt rúmlega tíu þúsund talsins. Þetta er því allmikil breyting.

Eitt vandamál gerir þó vart við sig. Frjósemi landsmanna fer minnkandi næstu árin. Í dag eignast hver íslensk kona 2,1 barn. (Að meðaltali eins og gefur að skilja.) Eftir sjö ár eignast íslenskar konur tvö börn slétt. Eftir það fer að draga úr barneignum og stúlkubörnin sem nú koma í heiminn eiga sennilega ekki eftir að eignast nema 1,85 börn að meðaltali. Þetta þýðir auðvitað að innfæddum Íslendingum á eftir að fækka. Þetta er þó ekki ástæða til að hafa áhyggjur því fólki af erlendum uppruna á eftir að fjölga í framtíðinni. (Þó eru reyndar einhverjir sem telja þetta ástæðu til að hafa áhyggjur og hafa jafnvel bundist samtökum um það.

Samhliða færri fæðingum (hlutfallslega) verða ungmenni hlutfallslega færri. Þrátt fyrir að Íslendingum fjölgi um 95 þúsund næstu 42 árin fjölgar þeim sem eru innan við tvítugt aðeins um fjögur þúsund.
Samt gæti þessi hófsama fjölgun ungmenna haft ein góð áhrif. Jólasveinninn þarf ekki að fara neitt mikið hraðar yfir en hann gerir í dag.