Rakst á frétt á netinu sem hljóðar einhvern veginn svona:

"Evrópuþingið vill að skák verði kennd við alla grunnskóla í Evrópusambandinu. Ganga á til atkvæðagreiðslu um málið í næsta mánuði og það yrði þá sent framkvæmdanefnd sambandsins til afgreiðslu í framhaldinu.

Þingið telur að skákiðkun skólabarna hafi ýmislegt jákvætt í för með sér. Hún skerpi m.a. á athyglisgáfu, sköpunargleði og einbeitingu barnanna.

Tveir af dönsku fulltrúunum á þinginu eru þó æfir yfir þessum áformum og segja þau grófa íhlutun í menntastefnu Danmerkur."

STÓRT LIKE Á ÞETTA!!

Skák er svakalega góð fyrir krakka, það þurfa sko alls ekkert allir að verða einhverjir afreksmenn. Skákin þroskar einfaldlega alls kyns þætti hjá krökkum; minni, rökhugsun, ákvarðanatöku, sköpun, einbetingu, reiknigetu, hugsa fram í tímann og fleira.

Og menn læra að taka tapi og bera virðingu fyrir andstæðingnum og viðfangsefninu; takast í hendur fyrir og eftir skák.

Ég er t.d. með ótrúlegt minni varðandi símanúmer og nöfn, pottþétt mín skákiðkun sem barn sem stuðlaði að því, ásamt auðvitað fleiru. Það er margt sem þroskar huga krakka eins og t.d. klassískt tónlistarnám - og skákin er líka svakalega gott tæki til þess.

Það er svo eitt stórmerkilegt við skákina; hún hefur reynst nemendum með ýmis vandamál mjög vel. Nemendur sem finna sig ekki í hefðbundni skólastofu, brjóta allt og bramla og rífa sig við hvern sem er geta sest niður rólegir við skákborð og teflt. Þetta hef ég eftir skólastjórnendum og fleirum sem sinna börnum og unglingum sem hafa ekki fundið sig í hinu hefðbundna skólakerfi.

Það er ef till vill frelsið og sköpunargleðin við taflborðið  sem þessi hæfileikaríku ungmenni njóta; í skák er ekkert blað, engin blýantur, engin fyrirmæli, engin ng- og nk regla, þú bara sest og teflir og lætur reyna á leyndardóma taflborðsins eins og þú sjálfur vilt.

Ungu mennirnir Jón Kristinn Þorgeirsson frá Akureyri og Vignir Vatnar Stefánsson ásamt fulltrúa Skáklandsins.

NM hefst eftir nokkra tíma. Mikil eftirvænting ríkir í hópnum enda eitt skemmtilegasta mót hvers árs að hefjast. Keyrslan er mikil og tefldar verða tvær umferðir næstu þrjá daga. Þá munar um að aðstæður séu góðar sem þær eru svo sannarlega í þetta skiptið.

Hér er sauna, pottur og fín sundlaug að hætti Finnanna. Hótelherbergin og maturinn eru svo í fínum málum.

Keppnissalurinn er virkilega flottur og verða sýndar 17 skákir beint í hverri umferð.

1. umferð hefst 11:00 að íslenskum tíma og verður þá um helmingur íslensku keppendanna í beinni útsendingu.

Bein útsending og allt um mótið má nálgast á www.skak.is

Skáksveit Laugalækjarskóla milli umferða.

Spennan var mikil fyrir síðustu umferðina á Reykjavíkurmóti grunnskólasveita sem fram fór í kvöld og spenntasti maðurinn á svæðinu án efa Svavar Viktorsson liðsstjóri Laugalæks. Fór svo að drengirnir hans stóðust pressuna og gerðu 2-2 jafntefli gegna Rimaskólasveitinni og tryggðu sér þannig Reykjavíkurmeistaratitilinn.

Sannarlega glæsilegt hjá Laugalækjarstrákunum sem eru flestir nemendur í Skákskóla Íslands og njóta jafnframt góðs af því mikla skákstarfi sem unnið er í sínum grunnskóla. Þar eiga mestan heiður Jón Páll Haraldsson aðstoðarskólastjóri og áður nefndur Svavar sem er kennari við skólann.

Sveit Reykjavíkurmeistaranna skipa; Rafnar Friðriksson, Jóhannes Kári Sólmundarson, Garðar Sigurðarson og Arnar Ingi Njarðarson.

Allt um mótið má sjá á www.skak.is á morgun.

"His name is Short and it will be short". Garry Kasparov um einvígi sitt við Nigel Short um "heimsmeistaratitilinn" í skák árið 1993.

En á stöðumyndinni átti Short ansi magnað plan gegn Timman, árið 1991 í Tilburg.

Hvert er planið hjá hvítum?

Rimaskóli hjá Ráðherra.

Reykjavíkurmót grunnskóla fer fram í dag í félagsheimili TR að Faxafeni 12.

Á mótinu teflir saman fjöldinn allur af reykvískum skákskólum en í miklum meirihluta reykvískra grunnskóla fer fram skákkennsla.

Rimaskóli er ríkjandi meistari og verður að teljast líklegt að skólinn sigri í dag. Skólinn er miklu meir en grunnskóli sem leggur áherslu á skák. Skólinn hefur á síðustu árum verið útungunarstöð sterkra skákmanna sem sést best á því að af 10 ungmennum sem fara á NM í Finnlandi síðar í vikunni koma fjórir úr Rimaskóla!!!!

Svo var náttúrulega Hjörvar Steinn Grétarsson landsliðsmaður í Rimaskóla í 10 ár.

Spurningin er í raun ekki hvort Rimaskóli sigri seinni partinn í dag, spurningin er hvort þeir geri það með fullu húsi.