Kristrún Heimisdóttir ritar mikla grein í Fréttaablaðið um helgina. Finnur að mörgu og gagnrýnir stjórnarflokkana, einkum VG, fyrir að semja af sér í Icesave málinu.

Á einum stað segir Kristrún:
“Í erindisbréfinu (Icesavenefndarinnar) sem varð ekki opinbert fyrr en í júní 2009, er sú óskiljanlega forsenda lögð til grundvallar að Ísland sé þá þegar búið að taka lán enda þótt opinbert og augljóst hafi verið að Bretar og Hollendingar ákváðu einhliða að greiða innistæðueigendum svo sem skjalfest er í viðaukasamningum frá júní. Indriði Þorláksson hefur svarað því til í fjölmiðlum að Ísland hafi "í raun tekið lán í október". Sú túlkun er svo algjörlega einstæð að ég hef hvergi fundið hana rökstudda í gögnum málsins. Í henni felst bæði ótrúlegt afsal réttarstöðu og sjálfsákvörðunarréttar Íslands og illbærileg viðurkenning á réttmæti kúgunaraðferða Breta og Hollendinga. Munum að samningarnir leggja allan kostnað á Ísland meðan Bretar og Hollendingar hafa fjárhagslegan hagnað af þeim. Höfum í huga að á þessum grunni greiða Íslendingar vexti til ríkjanna tveggja frá 1. janúar 2009 að telja sem nema ríflega 20 milljörðum íslenskra króna og var þó enginn samningur um lán undirritaður fyrr en í byrjun júní (og er ekki enn kominn á).”

Hér er rétt að benda Kristrúnu á tvennt:

1) Á síðasta ári greiddu íslenskir skattgreiðendur 32 milljarða í vexti og verðbætur af láni vegna gjaldþrots Seðlabankans. Samanlagt gæti þetta verið meira en 10 prósenta nafnvextir á því láni. Þetta er þyngri baggi en Icesave og mun verða það áfram.

2) Eftirfarandi fréttatilkynning var gefin út  af stjórnvöldum 11. október 2008:

“Að loknum uppbyggilegum viðræðum hafa hollensk og íslensk stjórnvöld náð samkomulagi um lausn mála hollenskra eigenda innstæðna á IceSave-reikningum Landsbankans.
Fjármálaráðherra Hollands, Wouter.J. Bos, og fjármálaráðherra Íslands, Árni M. Mathiesen tilkynntu þetta.
Ráðherrarnir fagna því að lausn hafi fundist á málinu. Wouter. J. Bos kvaðst einkum ánægður með að staða hollenskra innstæðueigenda væri nú skýr. Árni M. Mathiesen bætti við að aðalatriðið væri að málið væri nú leyst.
Samkmulagið kveður á um að íslenska ríkið muni bæta hverjum og einum hollenskum innstæðueiganda innstæður að hámarksfjárhæð 20.887 evrur. Hollenska ríkisstjórnin mun veita Íslandi lán til að standa undir þessum greiðslum og hollenski seðlabankin mun annast afgreiðslu krafna innstæðueigendanna.”

Eyðileggur þetta ekki helminginn af röksemdafærslu Kristrúnar?