Ég skora á Halldór Jón Kristjánsson fyrrverandi bankastjóra Landsbankans að stíga fram og útskýra hvers vegna hann gekk svo hart eftir því að Búnaðarbankinn lánaði Björgólfunum fyrir kaupum á Landsbankanum.

Sólon Sigurðsson fyrrverandi bankastjóri Búnaðarbankans hefur upplýst við RÚV að Halldór J. hafi hringt í sig dag eftir dag og beitt  þrýstingi fyrir hönd væntanlegra Landsbankakaupenda, Björgólfanna.

Jafnvel þótt spillt helmingaskiptaregla Sjálfstæðisflokksins og Framsóknarflokksins hafi komið við sögu kannast Halldór Ásgrímsson ekkert við þetta lán og þessar æfingar á sínum tíma að því er fram kom á Rás 2 síðdegis.

Hvers vegna þessi þrýstingur frá bankastjóra Landsbankans fyrir hönd manna sem fengu að kaupa bankann gegn fyrirheitum um að kaupa hann fyrir erlendan gjaldeyri? Rétt eins og um erlenda fjárfestingu væri að ræða??.

Ég hafði ávallt haft álit á Halldóri J. Kristjánssyni og taldi hann heiðarlegan mann.

Vill hann ekki gjöra svo vel að stíga fram og segja þjóð sinni sannleikann?

Og halda mannorði sínu?

Hann má líka svara þessum spurningum varðandi yfirlýsingu sína í Morgunblaðinu í dag.