Mótmælendur við Bessastaði og 55 til 60 þúsundir sem hafa skorað á forsetann að skjóta Icesavelögunum nýju til þjóðarinnar eru væntanlega þeirrar skoðunar að fella beri lögin í þjóðaratkvæðagreiðslu.

Verði það gert taka gömlu lögin gildi, sem Alþingi samþykkti síðastliðið sumar.

Þau eru alveg eins og lögin á borði forsetans.

Fyrirvörum, sem löggjafinn gerði við Icesave-samninginn þá, var breytt og eru varnirnar í lögunum á borði forsetans heldur minni en áður.

Breytingarnar urðu í samningaviðræðum við Hollendinga og Breta.

Það er hálfvitagangur að halda að unnt sé að kjósa af sér Icesaveskuldirnar í þjóðaratkvæðagreiðslu. Undir slíkt kynda stjórnarandstöðuflokkarnir. Enn skruma þeir fyrir lýðnum. Og vilja kalla nýjar milliríkjadeilur yfir þjóðina ofan á allt annað.

Sjálfur sting ég upp á að safnað verði liði undir nafninu DODefence og skorað á þing og ríkisstjórn að létta Seðlabankagjaldþrotinu af herðum þjóðarinnar, sem eru þó þyngri byrðar en Icesaveskuldin.

Óánægjan sem nú er spilað á er sú sama og ævinlega. Fólk vill ekki auknar skuldir. Fólk vill ekki hærri skatta. Fólk vill ekki lægra kaup. Fólk vill ekki verðbólgu. Fólk vill ekki ónýtan gjaldmiðil. Fólk vill ekki háa vexti.

Fólk vill ekki klíkuskap, undirhyggju og spillingu við endurúthlutun gæðanna.

Fólk vill réttlæti.

Þegar nýju Icesave-lögin taka gildi verður það verkefni ríkisstjórnarinnar að ráðast á þennan garð. Það er stóra verkefnið. Icesave er aðeins hluti vandans og minni enn hundruð milljarða Seðlabankaþrot.

Ég hvet menn endilega til þess að safna liði gegn drápsklyfjum sem á herðar okkur eru lagðar vegna tæknilegs gjaldþrots Seðlabankans. Það er að mínu viti enn skynsamlegra en að safna liði gegn byrðunum af Icesave-skuldinni.

Ég eftirlæt áhugasömum hér með hugmynd að nafni samtakanna: DODefence.