Nú óttast einhverjir stjórnarandstæðingar að stjórnvöld misnoti aðstöðu sína til að reka áróður fyrir því að Icesavelögin verði samþykkt í þjóðaratkvæðagreiðslu. Neyti aflsmunar eins og það er kallað.

Fela verður einhverjum að útbúa hlutlægt efni um Icesavesamninga við aðrar þjóðir og bera það fyrir kjósendur.

En enginn getur bannað nokkrum manni að hafa skoðanir eða tjá þær. Það á líka við um þingmenn. Slík mannréttindi eru varin í stjórnarskrá.

Fjölmiðlar gætu gegnt hér mikilvægu hlutverki. Eitt helsta markmið fjölmiðla er að upplýsa. Það samrýmist vel lýðræðishugsjónum og góðum uppeldismarkmiðum.

Upplýsing getur veitt mönnum ánægju og verið hin besta afþreying auk þess sem hún er talin forsenda skynsamlegrar hegðunar á markaði.

Upplýsing er einnig í þágu lýðræðisins ekki síst nú þegar þjóðin gengur til þjóðaratkvæðagreiðslu um Icesavevandann.

Jean Piaget, einn merkasti þróunarsálfræðingur tuttugustu aldar, heldur því fram, að mesta hætta nútímans sé fólgin í slagorðum, hópskoðunum og fullmótuðum hugsanabrautum.

Með upplýsingar að vopni og nokkurri þjálfun hefur sérhver maður forsendur til þess að greina á milli þess sem unnt er að sannreyna og hins sem aldei verður sannað. Þannig getur hann metið, andæft og gagnrýnt. Upplýstur maður metur sjálfur sannleiksgildi þess efnis sem borið er fram í fjölmiðlum og hvort það sé haldbært, nothæft eða gagnslaust.