Fína nafnið yfir könnun Fjármálaeftirlitsins á stöðu banka og sparisjóða er ÁLAGSPRÓF !
Álagspróf á bönkunum í ágúst í fyrra sýndu að allt væri í himnalagi!! Samt hafði mælst aukin áhætta í hækkun vaxtaálags og nánast hafði tekið fyrir aðgang íslensku bankanna að lánsfé erlendis löngu áður. Áhyggjur manna voru miklar og almennar hérlendis sem erlendis og matsfyrirtækin voru á nálum.

Nú stendur fyrir dyrum að stefna danska fjármálaeftirlitinu fyrir vítaverð afglöp í eftirliti sínu með Hróarskeldubanka sem fór á hausinn.

Skyldu Royal Bank of Scotland, HSBC og Nortern Rock hafa gengist undir álagspróf áður en breska ríkið rétti þeim hjálparhönd til þess að lifa af lánsfjárkreppuna?

Ætli þanþol og álag Lehmans banka hafi verið prófað áður en hann varð gjaldþrota?

Nú kemur fram í fréttum að verið sé að skoða vinnubrögð og álagspróf FME á bönkunum fyrir ári síðan. Fáeinum vikum fyrir hrun sýndu mælingar FME að  allt væri í lagi.

Krabbameinssjúklingur getur verið hitalaus. Það segir ekkert um sjúkdóminn hans þótt hitamælirinn sýni eðlilegan hita.

Alltaf ber að spyrja tveggja spurninga um mælingar:
a) Mælir mælitækið (álagsprófið) það sem því er ætlað að mæla?
b) Er mælingin áreiðanleg og nákvæm?

Flaut FME sofandi að feigðarósi?