Álitsgjafanum Gunnari Smára Egilssyni þykir fáránlegt að láta sér detta í hug að Samfylkingin leiti til Framsóknarflokks og Borgarahreyfingarinnar varðandi umsókn um aðild að ESB. Meirihluti þessara flokka á þingi sé naumur (33 þingmenn) og auk þess sé ekkert hægt að treysta einstaklingum í þessum hópi.

Þetta er rangt hjá Gunnari Smára og ber vott um venjubundna vantrú ef ekki fyrirlitningu á Alþingi og oftrú á íslenska ráðherraræðið sem hefur skyndilega látið á sjá.

Sannleikurinn er að Samfylkingin gæti með þegjandi samþykki VG borið upp tillögu á Alþingi um tafarlausa umsókn um aðild að ESB gegn því að niðurstaða samninga verði borin undir þjóðina, jafnvel í "leiðbeinandi" þjóðaratkvæðagreiðslu. 

Fyrir liggur að slík tillaga yrði samþykkt á þingi, jafnvel með stuðningi fjölda þingmanna Sjálfstæðisflokksins.

Það er svo allt önnur saga hversu hratt og örugglega aðildarumsókn verður hjálpræði þjóðarinnar í endurreisninni.