Á vefsíðu InDefence hafa um 32 þúsund einstaklingar skrifað undir svofellda áskorun:

„Ég skora á forseta Íslands, herra Ólaf Ragnar Grímsson, að synja nýjum Icesave lögum staðfestingar. Ég tel að það sé sanngjörn krafa að sú efnahagslega byrði sem ríkisábyrgðin leggur á íslenskan almenning og framtíðarkynslóðir þessa lands, verði borin undir íslensku þjóðina í þjóðaratkvæðisgreiðslu.“

Setjum sem svo að forsetinn synji lögunum staðfestingar. Setjum sem svo að ríkisábyrgðin á Icesave skuldbindingunum fari í þjóðaratkvæðagreiðslu. Setjum sem svo að kjósendur hafni lögunum og að ríkisábyrgðin falli þar með úr gildi.

Vaknar þá ekki ofurlítil spurning? Sem sé þessi:

Hvað verður þá til ráða?

Þá gjaldfellur öll Icesaveskuldin.

Íslendingar verða berir að því að vilja ekki endurgreiða fé sem þeir hafa tekið að láni hjá saklausu fólki.

Íslendingar verða lögsóttir.

Þeir gætu þurft að greiða 1.200 milljarða en ekki 700 milljarða.

Einn vinstrigrænn norðan úr landi sagði við mig í dag að það væri allt í lagi. Betra væri að neita að borga og tapa fyrir dómstólum en að samþykkja núverandi Icesave frumvarp.