Þorkell Sigurlaugsson, eitt sinn
framkvæmdastjóri Burðaráss - eignarhaldsfélags Eimskipafélags Íslands, ritar
merkilega færslu á spjallþræði fésbókar og á þar orðastað við Sigurð Boga
Sævarsson blaðamann.

Hafa ber í huga að Þorkell vann
hjá Eimskipafélaginu áður en það komst í hendur Björgólfsfeðganna.

Þorkell svarar Sigurði Boga
meðal annars með eftirfarandi hætti:

“Voru það ekki
útrásarvíkingarnir þeir Björgólfsfeðgar sem settu Eimskip á hausinn? Þeir gerðu
þúsundir landsmanna fátækari og hröktu burtu flesta stjórnendur félagsins þegar
þeir tóku við stjórn félagsins. Fórnarlömbin voru saklaust fólk.”

Síðar segir Þorkell og svarar
enn Sigurði Boga:

“Já, Sigurður, svo kynntist ég
þessu enn betur en þú og þá sá ég hvað stutt var í hefndina, hatrið og hvað
Hafskipsmálið mótaði alla þeirra valdabaráttu um Eimskip. Ég átti samt aldrei
annað en góð samskipti við Björgólfana þar til þeir komust í valdastöðu. Þá
varð ég að yfirgefa óskabarnið. (Eimskip)”

Merkilegt þetta með hatrið og hefndina. Þorkell fer varla með rangt mál um þessi atriði.

Fyrir þá sem ekki vita hlaut Björgólfur Guðmundsson dóm í Hafskipsmálinu svonefnda á níunda áratug síðustu aldar. Margt var reyndar rotið við þann málatilbúnað og gjaldþrot Hafskips eins og rakið hefur verið, m.a. í tveimur nýlegum bókum.