Pétur Blöndal, Sjálfstæðisflokki, og fleiri kvörtuðu yfir því á þingi í dag að fyrirhugaðir væru kvöldfundir á Alþingi vegna Icesave. Pétur mótmælti sérstaklega fyrir hönd barna sem gætu ekki notið samvista sem skyldi við foreldra sína, kjörna fulltrúa.

Eru kvöldfundirnir ekki afleiðing af málþófi stjórnarandstöðunnar í Icesave-málinu? Getur Pétur ekki sjálfum sér um kennt?

Ég hraðlas grein eftir Jón Steinsson hagfræðing í Mogganum í dag. Hann segir þar að illa hafi gengið að hækkað kröfur um gæði þess sem prófessorar og aðrir háskólamenn senda frá sér að rannsóknum og vísindalegum niðurstöðum. Þeir geti fengið fengið ódýra 30 punkta fyrir tvær birtingar á fræðigreinum í óþekktum íslenskum ritum en aðeins 20 punkta fyrir fræðigreinar sem  sleppa í gegn um nálaraugu ritrýndra vísindatímarita.

Jón var sem sagt að spyrja um gæði þess sem menn setja á blað í virðulegri akademíu Háskóla Íslands. Þessu yrði að breyta ef ætlunin væri að hífa HÍ upp í flokk 100 bestu háskóla heims.

Má ég biðja um að svipaðar kröfur verði gerðar til þess sem þingmenn segja í ræðustól. Gæðin eru oftast í öfugu hlutfalli við lengdina.

Þetta merkir nánast að því meir sem talað er um Icesave því minna er vitið í því sem sagt er.

Jón Steinsson segir að með fyrirkomulaginu í HÍ sé hvatt til meðalmennsku.

Ég segi að hvatt sé til meðalmennsku á þingi.