Í meira en ár hefur Sjálfstæðisflokkurinn – eftir Hádegismóalínunni – sýnt hroka, óbilgirni, ábyrgðarleysi og skort á iðrun og vilja til samvinnu um endurreisn.

Ég hafði einnig orð á þessu í pistli fimmtudaginn 17. desember.
Degi síðar vitnaði ég í endurreisnarskýrslu þá sem samin var fyrir landsfund flokksins í lok mars á þessu ári. Á þeim sama fundi tók Bjarni Benediktsson við formennsku í flokknum af Geir H. Haarde. 

19. desember birtist langt viðtal Agnesar Bragadóttur við Bjarna í sunnudagsútgáfu Morgunblaðsins.

Hvaða strókur stóð upp úr formanninum unga í viðtalinu?

"Fellum Icesave og höfnum aðild að ESB."

Af hverju les Bjarni ekki framangreinda endurreisnarskýrslu í rólegheitum frekar en að vera með þennan afturhaldssama rembing? Ég er alveg til í að samlesa textann með honum. Þessi vitleysa er honum ekki samboðin.

Hvernig stendur á því að Bjarni vill ekki taka til í Sjálfstæðisflokknum og siðbæta hann?
Það er fáránlegt af honum að fylgja villuljósum ofan úr Hádegismóum eða úr fylgiskönnunum.
Fylgisaukning Sjálfstæðisflokksins í nýlegum könnunum er sýndaraukning og stafar af töfum á afgreiðslu Icesave, sem flokkurinn stendur sjálfur fyrir, og töfum á framkvæmd stefnu stjórnvalda við endurreisn heimila og fyrirtækja. Auk þess eru smám saman að koma fram hin raunverulegu áhrif bankahrunsins og falls krónunnar, meðal annars í tímabundnum en óhjákvæmilegum skattahækkunum.

Sjálfstæðisflokkurinn þarf einmitt á formanni að halda sem hefur kjark til að flytja afhjúpandi ræðu byggða á endurreisnarskýrslu sjálfstæðismanna sjálfra frekar en að endurtaka röflið ofan úr Hádegismóum.