Mér skilst að Lilja Mósesdóttir (VG) hafi skoðað nýja Icesave-samkomulagið og breytta fyrirvara og komist að þeirri köldu niðurstöðu á grundvelli skynseminnar að þessi samningur við nágranna okkar steypti þjóðinni í glötun og því gæti hún ekki samþykkt hann.

Hún ætlar sem sagt að segja Evrópusambandinu, Alþjóðagjaldeyrissjóðinum, Hollendingum, Bretum, Norðurlöndunum, já kapítalismanum öllum, stríð á hendur.

Hún ætlar sem sagt að hrökkva í þjóðernisgírinn með heimastjórnararmi Sjálfstæðisflokksins sem styður sérreignarrétt sægreifanna yfir auðlindunum undan ströndum landsins.

Er Lilja alveg viss um að andúð hennar á ESB, AGS og Samfylkingunni og veiklyndi fyrir einangrunarhyggju og málflutningi þjóðernissinna í Sjálfstæðisflokknum og töframanna í Framsóknarflokknum trufli ekki kalt og skynsamlegt mat hennar? 

En hún er víst eitthvað óánægð með Sjálfstæðismenn og telur þá hafa leitt sig í gildru þegar þeir "plötuðu" hana til þess að samþykkja fyrirvarana í sumar en sátu sjálfir hjá. Þannig hafi Sjallarnir dregið úr þunga fyrirvaranna frammi fyrir Hollendingum og Bretum.

Getur einhver útskýrt fyrir mér á hvaða ferðalagi Lilja Mósesdóttir er?