Á fimmtudagsmorgni gerði embætti sérstaks saksóknara húsleit hjá útibúum tveggja þekktra endurskoðunarfyrirtækja hér á landi; KPMG og Price Waterhouse Cooper (PWC).
Franskur sérfræðingur á vegum Evu Joly hefur skoðað mat á eignum bankanna fyrir hrun og mat skilanefndanna.

Þar er grunsamlega mikill munur.

Grunurinn sem vaknar er að íslenskir endurskoðendur hafi fegrað stöðu bankanna til mikilla muna vel og lengi og allar götur fram í andlát þeirra fyrir ári.

Hafi íslenskir endurskoðendur tekið þátt í að falsa kerfisbundið tölur um stöðu bankanna undir merkjum KPMG og PWC verður það ekki aðeins hneyksli hér á landi heldur um um allan heim. Þessi virtu fyrirtæki munu bíða álitshnekki og skaði þeirra verður mikill.

Erlendir bankar, sem tapað hafa margfaldri Icesave upphæðinni á viðskiptum við íslensku bankanna munu hefja málarekstur gegn bönkunum, já endurskoðendunum og jafnvel íslenska ríkinu. 

Skandallinn verður jafnvel stærri en þegar Andersen, eitt virtasta endurskoðunarfyrirtæki Bandaríkjanna, féll með Enron orkurisanum. Andersen endurskoðunarfyrirtækið tók þátt í að fela skuldir og falsa stöðu Enron.
Hneykslið vegna Andersen endurskoðunarfyrirtækisins var í rauninni ekki minna en sjálft Enron hneykslið.

Matsfyrirtæki eins og Moodys, Standard & Poor's, allur almenningur og verðbréfamarkaðir um heim allan eiga að geta treyst endurskoðunarfyrirtækjunum og hlutlægni þeirra. Ef ekki þá hrynur verðbréfamarkaðurinn um heim allan. Menn verða að átta sig á því að árshlutauppgjör og ársskýrslur áritaðar af viðurkenndum endurskoðunarfyrirtækjum er hornsteinn viðskiptanna og uppspretta trúverðugleika þeirra.

Fréttir verða sagðar af þessum málum á næstunni. Margt bendir til þess að hér sé í uppsiglingu hneyksli sem sem valda mun íslensku þjóðinni ómældu tjóni og erfiðleikum við að endurheimta traust annarra þjóða.