Björgvin G. Sigurðsson ruddi brautina til nýrra tíma í íslenskum stjórnmálum er hann sagði af sér embætti viðskiptaráðherra.
Björgvin axlaði ábyrgð og tók með sér stjórn Fjármálaeftirlitsins og forstjóra þess.
Þess vegna á hann afturkvæmt í íslensk stjórnmál.

Lítum til dæmis til Svíþjóðar. Mona Sahlin var aðstoðarforsætisráðherra Ingvars Carlsson árið 1995 þegar dagblaðið Expressen upplýsti að hún hefði keypt Toblerone og bleiur með því að nota opinbert greiðslukort.
Mona sagði af sér í október það ár.
Hún er nú formaður sænska Sósíaldemókrataflokksins og líklegur forsætisráðerra eftir kosningarnar í landinu á næsta ári.
 
Ritt Bjærregård, sagði af sér ráðherraembætti eftir að hafa misnotað opinbert fé í veisluhöldum í tengslum við UNESCO-fund í París. Hún átti afturkvæmt í dönsk stjórnmál og varð meðal annars borgarstjóri í Kaupmannahöfn.

Svona mætti áfram telja.

Hann hefur gefið gott fordæmi. Hann vísar okkur veginn inn í verðleikaþjóðfélagið.

Kjósendur bjóða Björgvin velkominn aftur í stjórnmálin í kosningum í vor vegna þess að hann er maður sem axlar ábyrgð.